Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 489 Hüküm no: 731 Orijinal metin no: [60b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mecnun olduğu iddia edilen Hatice bt. Abdullah’ın yapılan kontrollerinde sağlıklı olduğunun anlaşıldığı Ma‘rûz; Sâdır olan fermân-ı âlîlerine imtisâlen medîne-i Üsküdar’da Hamza Fakih mahallesinde sâkine Hadice bt. Abdullah’ın mevlâ-yı ıtâkazâdesi sâhib-i arzuhâl mevâlî-i i‘zâmdan Sâbıkā mahrûse-i Bursa kādısı sa‘âdetlü, fazîletlü Mehmed Şerif Efendi ibni’l-merhûm Hamza Paşa taraflarından ber-vech-i âtî vekîl olduğu el-Hâc Mehmed b. Ali ve Ahmed Ağa b. Hasan nâm kimesneler şehâdetleriyle sâbit olan es-Seyyid Hüseyin Efendi b. İbrahim nâm kimesne meclis-i şer‘-i hatîrde zâtı mu‘arrefe mezbûre Hadice ile üvey oğlu arzuhâlde ismi mezkûr Mehmed Tâhir Efendi b. el-Hâc Ahmed Ağa muvâcehelerinde mezbûre Hadice Hatun müvekkilim mûmâ-ileyhin vâlidesi merhûm-ı müşârün-ileyh Hamza Paşa’nın câriye-i mu‘takası olup mukaddemâ mezbûr Mehmed Tâhir Efendi’nin babası mezbûr el-Hâc Ahmed Ağa’nın zevce-i menkûhası olduğu hâlde zevci mezbûr el-Hâc Ahmed Ağa vefât eyledikde üvey oğlu mezbûr Mehmed Tâhir Efendi menzilinde sâkine, lâkin mezbûre Hadice mecnûne olmağla emvâl ve eşyâsını üvey oğlu mezbûr Mehmed Tâhir Efendi’ye temlik ve itlâf ve izâ‘at etmekle ol-vechile mezbûre Hadice’nin ber-vech-i muharrer tasarrufâtı gayr-ı sahîha olmağla mezbûre Hadice eşyâsıyla müvekkilim mûmâ-ileyh menziline nakl olunmak bi’l-velâye ve bi’l-vekâle murâdımdır deyü da‘vâ ve mezbûre Hadice istintâk olundukda vechen mine’l-vücûh etvâr ve evzâ‘ında ve ef‘âl [ve] akvâlinde cünûniyyeti ve ihlâl-i aklını mûcib hâli müşâhede olunmadığından mâ‘adâ âkıle ve reşîde olup bi’l-cümle tasarrufâtı nâfize olduğunu mahalle-i mezbûre imâmı Hafız Mehmed Efendi ve sâir bî-garaz haber vermeleriyle mezbûre Hadice Hatun fî-mâ ba‘d dilediği mahâlde sâkine olup kimesne tarafından müdâhale iktizâ etmediği mübâşiri kulları iltimâsıyla huzûr-ı âlîlerine i‘lâm olundu. Fî 12 min-Za sene 1205