Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 493 Hüküm no: 738 Orijinal metin no: [61a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mecnun olan ve ahaliye zarar veren Meryem Nasraniye’nin kilisede muhâfazası Ma‘rûz; Medîne-i Üsküdar esvâkı ahâlisinden Ali Ağa b. Mustafa ve es-Seyyid Mehmed b. Ali ve el-Hâc İbrahim b. Mehmed ve İbrahim Efendi b. Ali ve Veli Beşe b. Mehmed ve es-Seyyid Ali b. Abdi ve Mustafa b. Musa ve Ahmed Beşe b. Ali ve Hafız Mehmed b. İbrahim ve Molla Mustafa b. Mustafa ve el-Hâc Osman b. Mehmed ve es-Seyyid Mehmed b. Hasan nâm kimesne[ler] cemm-i gafîr Müslimîn meclis-i şer‘-i hatîrde bir iki seneden beri Maryem nâm Nasrâniye Galata cânibinden medîne-i mezbûreye gelip cünûn-ı mutbıka ile mecnûne olduğu hâlde bilâ-hâil ve lâ-mâni‘ ve leyl ü nehâr dükkânlarımız önünde meks ve ikāmet ve geşt ü güzârân ve gecelerde çanak içinde ateş yakıp bir vechile muhâfazası mümkün olmadığından gayri mürûr u ubûr eden ehl-i İslâm ricâl ve nisâ ve sıbyânın üzerlerine hücûm ve şütûm-ı galîza ile şetm ve ba‘zı sabînin dahi ızrâr ve ihlâkine kasd edip hatta târih-i i‘lâm günü bir sabîyi boğazından ahz ve envâ‘-ı meşakkat ile yedinden tahlîs olunup bu misillü mecnûne Nasrâniye mahmiye-i İslâmbol’da Eğrikapı kenîsasında olunageldiğine binâen bundan akdem bir def‘a bâ-i‘lâm dahi zikr olunan kenîsada muhâfaza olunmuş iken bir takrîb ıtlâk olunmağla mezbûreden bi’l-külliye rahat ve emniyetimiz meslûb olmuşdur deyü ihbâr ve fî-mâ ba‘d medîne-i mezbûreye ayak basmamak üzere zikr olunan kenîsada muhâfaza olunmak bâbında fermân-ı âlîlerî sudûrunu her biri istirhâm eyledikleri bi’l-iltimâs huzûr-ı âlîlerine i‘lâm olundu. Fî 18 min-Za sene 1205