Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 494 Hüküm no: 741 Orijinal metin no: [61a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan b. Hüseyin’in oturduğu vakıf evin kirasını ödemesi Ma‘rûz; Medîne-i Üsküdar’da vâki‘ merhûme Hacce Hüsni(ye) Hatun mahallesi mescid-i şerîfinde müceddeden binâ olunan mekteb ve cihât-ı sâire içün mevkūfe-i vakfın vâkıfı ve mütevellîsi eşrâf-ı kuzâtdan el-Hâc İsmail Efendi b. Bekir tarafından ber-vech-i âtî vekîl-i şer‘îsi diğer el-Hâc İsmail Efendi b. Süleyman nâm kimesne medîne-i mezbûrede mahfil-i bâbda meclis-i şer‘-i hatîrde Hüseyin b. Hüseyin nâm kimesne mahzarında vakf-ı mezbûr musakkafâtından mahalle-i mezbûrede vâki‘ ma‘lûmü’l-müştemilât bir bâb menzilin rub‘ı mahlûl ve taraf-ı vakfa âid olmağla rub‘ menzil-i mezkûru senevî doksan akçe icâre-i müeccele ve otuz guruş icâre-i mu‘accele ile mezbûr Hüseyin’e bi’l-vekâle îcâr ve teslîm eylediğimde ol dahi istîcâr ve tesellüm ve kabûl ve mu‘accel-i merkūm otuz guruş ile menzil-i mezkûrun iki senelik icâresinden zimmetinde müctemi‘a olan altı guruş ki cem‘an otuz altı guruşu bi’l-vekâle taleb ederim deyü da‘vâ etdikde ol dahi ikrâr ü i‘tirâf edip meblağ-ı mecmû‘-ı merkūm otuz altı guruşu târih-i i‘lâmdan on gün tamamında edâya ta‘ahhüd ve vekîl-i mezbûr dahi râzı olduğu bi’l-iltimâs huzûr-ı âlîlerine i‘lâm olundu. Fî 5 min-Za sene 1205