Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 495 Hüküm no: 742 Orijinal metin no: [61a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hanım’ın tedavi için kullandığı haptan dolayı çocuğunu düşürdüğü gerekçesiyle açtığı tazminat davasına itibar edilmediği Ma‘rûz; Medîne-i Üsküdar’da Arakıyeci el-Hâc Mehmed mahallesinde sâkine mu‘arrefetü’z-zât Hadice bt. Ali nâm hatun zevci es-Seyyid el-Hâc Mehmed Efendi b. el-Hâc Mehmed hâzır olduğu hâlde medîne-i mezbûrede mahfil-i bâbda meclis-i şer‘-i hatîrde kezâlik zâtı mu‘arrefe Hanife bt. Hasan nâm hatun muvâcehesinde mezbûre Hanife’nin zevci Mehmed Ali b. Hasan nâm kimesne hâzır olduğu târih-i i‘lâmdan üç ay mukaddem Frengî ta‘bîr olunur ağzımda zuhûr eden illetin def‘i içün mezbûre Hanife Hatun’un zevci hâzır-ı mezbûrun amel eylediği hap-ı mürettebi bana i‘tâ ben dahi illetin def‘i içün kendi rızâm ile bir hafta kadar ekl etmiş idim lâkin zikr olunan hapı ekl esnâsında zevcim hâzır-ı mezbûrun firâşından hâsıl hamlim olup gayr-ı müstebîni’l-hilka bir cenîn-i meyyit ilkā etmemle hamlimin sükūtuna sebeb-i câiz ki ekl eylediğim mârrü’z-zikr hap olmuş olmağla mûcib-i şer‘îsini zevcân-ı mezbûrân Mehmed Ali ve Hanife’den taleb ederim deyü müdde‘iye-i mezbûre Hadice’nin ber-vech-i muharrer tasaddî eylediği da‘vâ-yı gayr-ı meşrû‘asına iltifât olunmadığı bi’l-iltimâs huzûr-ı âlîlerine i‘lâm olundu. Fî 18 min-Za sene 1205