Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 433 Hüküm no: 453 Orijinal metin no: [104a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Canbaz Ahmed b. Hüseyin’in kusurlu atı Süleyman Çelebi’ye sattığı Ma‘rûz Muhzır Ali mübâşeretiyle ihzâr-ı şer‘î olunan canbaz tâifesinden Ahmed b. Hüseyin’den hasmı Süleyman Çelebi meclis-i şer‘de târih-i i‘lâmdan üç gün mukaddem me[r]kūm Ahmed yedinde mülkü olup cemî‘ uyûbundan sâlim olmak üzere seksen yedi guruş semen-i medfû‘ ve makbûza bir re’s işbu kır atı bana bey‘ ve teslîm ben dahi ber-vech-i muharrer iştirâ ve kabz etmişidim hâlâ harâret ayıbıyla mu‘ayyeb ve uyûb-ı mezkûr kadîmî olup inde’t-tüccâr noksan semen îcâb eden uyûbdan olmağla red murâd ederim deyü da‘vâ eyledikde evvelâ teveccüh-i husûmet için bâ-fermân-ı âlî ehl-i hibre ta‘yîn olunan Ahmed Çelebi b. İvaz ve Hasan b. Receb nâm kimesnelere irâet olundukda mârru’z-zikr at ayb-ı mezbûr ile mu‘ayyeb olduğunu ba‘de’l-ihbâ[r] merkūm Ahmed istintak olundukda ayb-ı mezbûrun kadîmîni inkâr etmeğin mezbûrân Ahmed Çelebi ve Hasan nâm kimesneler ayb-ı mezbûr üç günden ekalde hâdis olur değildir kadîmdir deyü her biri edâ-yı şehâdet-i şer‘iyye edip ve’t-tezkiye şehâdetleri makbûle olmağın ba‘de’t-tahlîfü’ş-şer‘î mûcebiyle ba‘de’l-hükm ve’t-tenbîh olunduğu bi’l-iltimâs huzûr-ı âlîlerine i‘lâm olundu. Fî 27 Safer sene [1]143.