Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 434 Hüküm no: 454 Orijinal metin no: [104a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seydî Süleyman’ın Yahûdi Şabatay’a ticaret için verdiği paranın iâdesine tenbih olunması Bâ-mühr-i hazret-i efendi. Ma‘rûz Arzuhâl eden Seydî Süleyman derûn-ı arzuhâlde ismi merkūm Şabatay nâm Yahûdi’den bundan akdem ben mâlımdan bin beş yüz guruş ikrâz ve merkūm Şabatay dahi mâlından beş yüz guruşu ikrâz ve birbirinde halt ve nemâsını beynimizde münâsafa olmak üzere vücûh-ı ticâretde akd-i şirket ettiğimizde merkūm Şabatay mâl-ı şirket ile iştirâ ettiği metâ‘ı nes’eten âhara bey‘ etmemek üzere mezbûr Şabatay Yahûdi’yi nehy ile akçeyi teslîm ol dahi tesellüm ve kabz etmişiken merkūm Şabatay Yahûdi mâl-ı şirket ile iştirâ ettiği emti‘ayı nehyime muhâlif nes’eten âhara bey‘ ve teslîm ile istihlâk edip bana ancak iki yüz elli guruş teslîm etmekle mâ‘adâ bin iki yüz elli guruşu bi-tarîkı’z-zamân merkūm Şabatay Yahûdi’den taleb ederim deyü da‘vâ ol dahi cevâbında fi’l-vâki‘ müdde‘î-i merkūm ile akd-i şirket ve yedinden bin beş yüz guruş kabzını ve müdde‘î-i merkūmun nes’eten bey‘ etme deyü nehyini ikrâr lâkin akçeyi metâ‘a bozup metâ‘ yedinde iken müdde‘î-i merkūm nes’eten bey‘e bana izin vermişidi deyü def‘a tasaddî ve def‘ini isbâta havâle olundukda ikāmet-i beyyineye kādir olmayıp tahlîfe dahi taleb olmamağla mûcebiyle bin iki yüz elli guruşu sâhib-i arzuhâl mezbûr Seydî Süleyman’a bi-tarîkı’d-damân edâya merkūm Şabatay Yahûdi’ye tenbîh olunduğu huzûr-ı âlîlerine i‘lâm olundu. Fî 27 Safer sene [1]143.