Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 496 Hüküm no: 745 Orijinal metin no: [61b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kigork ve Agop’un müştereken kiraladıkları bağa süresi dolmadan yapılan müdahalenin men edilmesi Ma‘rûz; Medîne-i Üsküdar’a tâbi‘ Kādı karyesi mütemekkinlerinden Kigork ve Agop veledey Karabet nâm zimmîler medîne-i mezbûrede mahfil-i bâbda meclis-i şer‘-i hatîrde zikri âtî bağ-ı mahdûd-ı münâza‘un-fîhe vâzı‘ü’l-yed olan Bostanî Osman Ağa b. Ömer nâm kimesne mahzarında gāib ani’l-meclis Kapamacı Rapail nâm zimmî karye-i mezbûre kurbünde Moda nâm mahâlde vâki‘ mâlik olduğu ma‘lûmü’l-hudûd ve’l-müştemilât bir kıt‘a bağını bin iki yüz dört senesi rûz-ı Kasım’ı ibtidâsından beş senesi rûz-ı Kasım’ı duhûlüne değin otuz guruş ücret tesmiyesiyle bize maktû‘an îcâr, biz dahi ba‘de’l-istîcâr bağ-ı mahdûdun tımarına doksan üç guruş yirmi beş para dahi masrûfumuz olmuş iken gāib-i merkūm bağ-ı mahdûd-ı mezkûru bizim gıyâbımızda bilâ-feshi’l-icâre mezbûr Osman Ağa’ya semen-i ma‘lûm ve makbûza bâtten bey‘ u teslîm edip ol dahi bizi bağ-ı mezkûrun menfa‘atinden men‘ etmekle müdâhalesi def‘ ve bağ-ı mahdûdu bize teslîme tenbîh olunmak matlûbumuzdur deyü ba‘de’d-da‘vâ ve’l-istintâk ve’l-ikrâr mûcebiyle bağ-ı mezkûrdan ecel-i merkūm hulûlüne değin keff-i yed edip ta‘arruz etmemek üzere mezbûr Bostanî Osman Ağa’ya şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 21 min-Za sene 1205