Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 497 Hüküm no: 746 Orijinal metin no: [61b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Yahya’nın eşini ailesinden ayrı bir evde oturma sözü verdiği Ma‘rûz; Mevâdd-ı şer‘iye istimâ‘ı içün kıbel-i şer‘-i şerîfden meb‘ûs Mustafa Efendi dâ‘îleri medîne-i Üsküdar’a tâbi‘ İstavros karyesine varıp mazbûtü’l-esâmî Müslimîn huzûrlarında akd-i meclis-i şer‘-i şerîf etdikde karye-i mezbûrede sâkine Zübeyde bt. Mehmed tarafından ber-vech-i âtî vekîl olduğu zâtını ârifân Abdullah Beşe b. İbrahim ve İslâm Beşe b. Memiş nâm kimesneler şehâdetleriyle sâbit olan es-Seyyid İbrahim Efendi b. Mehmed meclis-i ma‘kūd-ı mezkûrda müvekkile-i mezbûrenin hâlâ zevci Mehmed Emin b. Yahya muvâcehesinde müvekkilem mezbûre Zübeyde Hatun mezbûr Mehmed Emin’in zevce-i medhûlün-bihâsı olup lâkin ebeveyni ile mâ‘an bir menzilde iskân etmekle galak ve merâfıkı başka mesken-i şer‘îde iskân içün kıbel-i şer‘den mezbûr Mehmed Emin’e tenbîh olunmak bi’l-vekâle matlûbumdur deyü da‘vâ ve mezbûr Mehmed Emin cevâbında fi’l-hakīka hâl vekîl-i mezbûrun takrîr-i meşrûhu üzere olduğunu ikrâr ve fî-mâ ba‘d menzilleri kurbünde galak ve merâfıkı başka mesken-i şer‘îde iskâna ta‘ahhüd eyledikde vekîl-i mezbûr dahi râzı olup bu vechile kat‘-ı münâza‘a eyledikleri ba‘de’l-inhâ huzûr-ı âlîlerine i‘lâm olundu. Fî 15 min-Za sene 1205