Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 498 Hüküm no: 748 Orijinal metin no: [61b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ezegül v. Agop ile Davit v. Manas’ın aralarındaki alacak verecek davasında sulh oldukları Ma‘rûz; Medîne-i Üsküdar’da Yenimahalle’de mütemekkin Avakel v. Agob nâm zimmî meclis-i şer‘-i hatîrde Davit v. Manas nâm zimmî muvâcehesinde merkūm Davit zimmî zimmetinde târih-i i‘lâmdan iki ay mukaddem elli guruş hakkım olup mahkeme-i mezbûrede taleb ve da‘vâ ve şer‘an tahlîf olunmağla niçün benden da‘vâ eyledin deyü beni Sâbıkā izzetlü bostancıbaşı ağaya teşekkî ve üç yüz guruş tecrîm etdirmeye sebep olmağla merkūm Davit zimmîden taleb ederim deyü da‘vâ ve ba‘de-vukū‘ı’l-münâza‘a beynlerine muslihûn tavassut edip müdde‘î-i mezbûr eylediği da‘vâsından yirmi guruş bedel-i makbûz mukābelesinde merkūm Davit zimmî ile sulh olup ziyâde müdde‘âsı olan iki yüz seksen guruşa müte‘allika âmme-i de‘âvîden merkūm Davit zimmînin zimmetini ba‘de’l-ibrâ ve’l-kabûl kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 9 min-Za sene 1205