Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 498 Hüküm no: 749 Orijinal metin no: [61b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emin b. İsmail’in Mehmed Ağa’dan alacaklı olduğu yolundaki iddiasını ispatlayamadığı Ma‘rûz; Sarbânbaşı sâhib-i arzuhâl Kütahyalı el-Hâc Emin b. İsmail nâm kimesne medîne-i Üsküdar’da meclis-i şer‘-i hatîrde arzuhâlde ismi mezkûr Mehmed Ağa b. Hüseyin mahzarında mezbûr Mehmed Ağa mukaddemâ merhûm Abdi Paşa hazretlerinin harem kethudâsı, ben dahi sarbânbaşılık hizmetinde iken târih-i i‘lâmdan on yedi ay mukaddem sâlifü’z-zikr Kütahya’da cebelden hatab kat‘, merhûm-ı müşârün-ileyhin katırlarıyla sarayına getirmek üzere akdi kendiye izâfet ile beher şehr on sekiz guruş ücret kavl edip bir ay hatab kat‘ ve nakletmemle tesmiye olunan on sekiz guruş ücretim ile mezbûr Mehmed Ağa’nın bi-şarti’r-rücû‘ emriyle on üç neferimin ta‘âmiyesi içün yevmiye yüzer paradan bir ayda mâlımdan masrûfum olan yetmiş beş guruş ba‘dehû develeriyle kat‘-ı hatab ve nakletmek içün beher şehr on ikişer guruş benimle ücret kavl edip dokuz ay kezâlik hatab kat‘ ve nakl edip şühûr-ı mezkûrede müstehakk olduğum yüz sekiz guruş ücretim ile yedi neferimin ta‘âmiyesi içün kezâlik emriyle yevmiye altmışar paradan dokuz ayda masrûfum olan dört yüz beş guruş ve yine bi-şarti’r-rücû‘ emriyle iştirâ eylediğim yirmi dört aded urgan ve garâr ta‘mîri içün mâlımdan sarf eylediğim otuz yedi guruş ki cem‘an altı yüz kırk üç guruş hakkımın on iki buçuk guruşunu yedinden ahz ü kabz edip altı yüz otuz buçuk guruş hakkım zimmetinde bâkī kalmağla taleb ederim deyü da‘vâ ve mezbûr Mehmed Ağa cevâbında fi’l-hakīka müdde‘î-i mezbûr paşa-yı müşârün-ileyhin sârbânlık hizmetinde olduğunu ikrâr ve akdi kendiye izâfet ile ücret kavlini ve masrûfâtında emrini bi’l-külliye inkâr etmeğin müdde‘î-i mezbûr müdde‘âsını beyândan izhâr-ı acz ile bi’t-taleb mezbûr Mehmed Ağa gıbbe’t-tahlîfi’ş-şer‘î mûcebiyle müdde‘î-i mezbûr el-Hâc Emin, da‘vâ-yı mezkûresiyle mezbûr Mehmed Ağa’ya bilâ-beyyine mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 26 min-Za sene 1205