Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 499 Hüküm no: 750 Orijinal metin no: [61b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Abdullah’ın kocası İsmail’in kendisinden aldığını iddia ettiği eşya, para ve altın davasını ispatlayamadığı Ma‘rûz; Medîne-i Üsküdar’da Bulgurlu mahallesinde sâkine mu‘arrefetü’z-zât Âişe bt. Abdullah nâm hatun medîne-i mezbûre mahkemesinde meclis-i şer‘-i hatîrde hâlâ zevci es-Seyyid İsmail b. es-Seyyid Halil mahzarında mezbûr es-Seyyid İsmail târih-i i‘lâmdan sekiz ay mukaddem yedimden istidâne ve kabz ve umûruna sarfla istihlâk eylediği bin guruş kıymetli ecnâs ve a‘dâdı beynimizde ma‘lûm altunumu ve yine bi’d-defa‘ât yedimden istidâne ve kabz eylediği seksen guruş ve mâ‘an sâkin olduğumuz menzilde odam derûnunda mevcûde emlâkimden mecmû‘u yetmiş altı guruş kıymetli bir çift zümrüd küpe ve bir sîmli ta‘âm kaşığı ve beş değirmi yemeni ve dört aded İslâmbol zer-i mahbûbu nısfiyesi âvîze olunmuş fesimi benim izin ve icâzetimsiz fuzûlî ahz etmekle meblağ-ı mezkûr altunlar ile eşyâ-i muharrere-i mezkûre mevcûde ise a‘yânını müstehleke [ise] ba‘de’s-sübût kıymet-i şer‘iyelerini hâlâ zevcim mezbûr es-Seyyid İsmail’den taleb ederim deyü ba‘de’d-da‘vâ ve’l-istintâk ve’l-inkâr müdde‘iye-i mezbûreye ber-vech-i muharrer müdde‘âsını beyândan izhâr-ı acz birle bi’t-taleb mezbûr es-Seyyid İsmail gıbbe’t-tahlîfi’ş-şer‘î mûcebiyle müdde‘iye-i mezbûre husûs-ı mezkûrda zevci mezbûr es-Seyyid İsmail’e bilâ-beyyine mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 13 min-Za sene 1205