Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 500 Hüküm no: 753 Orijinal metin no: [62a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Mustafa’nın Osman Efendi’ye olan borcunu ödemesi Ma‘rûz; Medîne-i Üsküdar’da Mehmedpaşa mahallesinde sâkin müderrisîn-i kirâmdan Osman Efendi b. Mehmed medîne-i mezbûrede mahfil-i bâbda meclis-i şer‘-i hatîrde es-Seyyid Mustafa b. Mustafa nâm kimesne mahzarında mezbûr es-Seyyid Mustafa bin iki yüz üç senesi Saferi’nin on beşinci günü Yedimden istidâne ve kabz ve umûruna sarfla istihlâk eylediği iki yüz guruş deyni mukābelesinde Mumcubaşı Vakfı’ndan olup mahalle-i mezbûrede vâki‘ bir kıt‘a temessük mantûkunca mutasarrıf olduğu bir bâb vakıf menzilini bâ-re’y-i mütevellî bana ferâğ ve teslîm eyledikden sonra menzil-i mezkûru ba‘de’t-tahliye ve’t-takābuz diğer bir kıt‘a temessük mantûkunca beher şehr yüzer para ücret tesmiyesiyle yedimden istîcâr edip meblağ-ı merkūm iki yüz guruşun seksen beş guruşunu bana edâ ve teslîm edip bâkī yüz on beş guruş ile menzil-i mezkûr ücretinden bâkī üç guruş otuz para ki cem‘an yüz on sekiz guruş otuz para hakkım mezbûr es-Seyyid Mustafa zimmetinde kalmağla menzil-i mezkûru mezbûr es-Seyyid Mustafa’ya red ve meblağ-ı bâkī yüz on sekiz guruş otuz parayı mezbûr es-Seyyid Mustafa’dan taleb ederim deyü ba‘de’d-da‘vâ ve’l-istintâk ve’l-ikrâr mûcebiyle müdde‘î-i mezbûr Osman Efendi menzil-i mezkûru mezbûr es-Seyyid Mustafa’ya red ve mezbûr es-Seyyid Mustafa dahi meblağ-ı bâkī-i merkūm yüz onsekiz guruş otuz parayı müdde‘î-i mezbûr Osman Efendi’ye edâ ve teslîme her biri ilzâm olunduğu bi’l-iltimâs huzûr-ı âlîlerine i‘lâm olundu. Fî 18 min-Za sene 1205