Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 501 Hüküm no: 754 Orijinal metin no: [62a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdülkerim Ağa’nın Mehmed b. Hasan’a olan borcunu ödemesi Ma‘rûz; Hizmetkâr makūlesinden Mehmed b. Hasan nâm kimesne medîne-i Üsküdar’da mahfil-i bâbda meclis-i şer‘-i hatîrde Abdülkerim Ağa b. Mustafa mahzarında ben beher şehr dörder guruş ücret kavliyle işbu târih-i i‘lâm senesi Ramazan ve Şevvâli’l-mükerrem’inde iki ay mezbûr Abdülkerim Ağa’ya talebiyle hizmet etmemle şehreyn-i mezkûreynde müstehak olduğum sekiz guruş ecr-i müsemmâm ile eşyâ-i memlûkemden cem‘an kıymetleri sekiz buçuk guruşa bâliğ bir aba ve bir şayak poturumla ve bir kebem dahi hâlâ zimmetinde olmağla taleb ederim deyü da‘vâ ve mezbûr Abdülkerim Ağa cevâbında eşyâ-i mezkûreyi inkârından mâ‘adâ ücret-i mezkûresi olan meblağ-ı merkūm sekiz guruşun altı buçuk guruşunu yedinden [yedimden] ahz ve bir buçuk guruş [guruş] deynim bâkī kalmış idi deyü eylediği def‘ini müdde‘î-i mezbûr ikrâr etmeğin müdde‘î-i mezbûrun müdde‘âsı olan eşyâ-i mezkûreyi beyân ve isbâtdan izhâr-ı acz edip talebiyle mezbûr Abdülkerim Ağa gıbbe’t-tahlîfi’ş-şer‘î mûcebiyle müdde‘î-i mezbûr eşyâ-i mezkûre mutâlebesiyle bilâ-beyyine mu‘ârazadan ba‘de’l-men‘ mukırr u mu‘terif olduğu bir buçuk guruşu müdde‘î-i mezbûr Mehmed’e edâsıyla mezbûr Abdülkerim Ağa ilzâm olunduğu bi’l-iltimâs huzûr-ı âlîlerine i‘lâm olundu. Fî 3 min-Şevvâl sene 1205