Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 501 Hüküm no: 755 Orijinal metin no: [62a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gavril v. Hayim’in Danil v. Mardıros’a olan borcunu ödemesi Ma‘rûz; Mahmiye-i İslâmbol’da Bezistân civârında mütemekkin Alacacı Danyal v. Mardıros nâm zimmî medîne-i Üsküdar’da meclis-i şer‘-i hatîrde Gavril v. Hayim nâm Yahûdî muvâcehesinde merkūm Gavril’in bundan akdem yedimden iştirâ ve kabz eylediği ecnâs-ı muhtelife akmişe semeninden yüz elli altı guruş hakkımın on beş guruşunu ahz bâkī yüz kırk bir guruşu hâlâ zimmetinde kalmağla taleb ederim deyü da‘vâ ve merkūm Gavril Yahûdî cevâbında fi’l-hakīka müdde‘î-i merkūma cihet-i mezkûreden ol-mikdâr deyni olduğunu ikrâr, lâkin müdde‘î-i merkūm kabzını mu‘terif olduğu on beş guruşdan mâ‘adâ elli beş guruş dahi teslîm edip ancak zimmetimde seksen altı guruş deynim bâkī kalmışdır deyü ba‘de’d-def‘ ve’l-ikrâr dâfi‘-i merkūm Gavril zimmî def‘-i mezkûrunu beyândan izhâr-ı acz birle bi’t-taleb müdde‘î-i merkūm Danyal zimmî gıbbe’t-tahlîfi’ş-şer‘î mûcebiyle meblağ-ı merkūm yüz kırk bir guruşu müdde‘î-i merkūma edâ ve teslîme merkūm Gavril Yahûdî’ye şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 4 min-Za sene 1205