Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 434 Hüküm no: 455 Orijinal metin no: [104a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman’ın cariyesini es-Seyyid Ahmed Ağa’nın cariyesi sanarak satan Mehmed’den cariyenin bedelinin tahsili Bâ-mühr-i hazret-i efendi. Ma‘rûz. Arzuhâl eden Süleyman derûn-ı arzuhâlde mastûrü’l-ism Mehmed nâm kimesneden bundan akdem hizmetinde olduğum es-Seyyid Ahmed Ağa nâm kimesne yedine emâneten vaz‘ eylediğim iki yüz elli guruş kıymetli Gürciyyetü’l-asl Âişe nâm câriyemi merkūm Mehmed bi-gayr-ı hakkın âhara bey‘ ve istihlâk eyledi deyü merkūm Mehmed’den da‘vâ eyledikde ol dahi câriye-i merkūmeyi iki yüz elli guruş semen-i makbûza mezbûr Seyyid Ahmed Ağa’nın mâlı olmak zu‘muyla ba‘de vefâtihi mezbûr es-Seyyid Ahmed Ağa’nın bi’l-vesâye düyûn-ı müsbetesi’çün bey‘ eylediğini ikrâr müdde‘î-i merkūmun câriye-i memlûkesi olduğunu bi’l-vesâye inkâr eyledikde müdde‘î-i merkūm Süleyman mezbûr Mehmed’in iki yüz elli guruş semen-i makbûza âhara bey‘ eylediği Gürciyyetü’l-asl Âişe nâm câriye yedinde mülkü olduğu hâlde hizmetinde olduğu es-Seyyid Ahmed Ağa yedine bizim huzûrumuzda [104b] emânet vaz‘ eylediği câriye-i memlûkesidir deyü şuhûd-ı udûlden Ahmed b. Mustafa ve İbrahim b. Osman nâm kimesneler şehâdet etmeleriyle ba‘de’t-ta‘dîl ve’t-tezkiye şehâdetleri makbûle olmağın mezbûr Süleyman ba‘de’t-tahlîfü’l-mu‘teber meblağ-ı mezbûr iki yüz elli guruşu sâhib-i arzuhâl mezbûr Süleyman’a teslîme merkūm Mehmed’e tenbîh olunduğu huzûr-ı âlîlerine i‘lâm olundu. Fî 27 Safer sene [1]143.