Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 502 Hüküm no: 756 Orijinal metin no: [62a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Feyzullah’ın üvey oğlu Seyyid Mustafa’ya olan borcunu ödemesi Ma‘rûz; Medîne-i Üsküdar’da Aşcıbaşı mahallesinde sâkin es-Seyyid Mustafa b. Mustafa medîne-i mezbûrede meclis-i şer‘-i hatîrde üvey babası diğer es-Seyyid Mustafa b. Feyzullah mahzarında mezbûr es-Seyyid Mustafa bin iki yüz dört senesi Receb-i şerîf’inin gurresinde yedimden bi-tarîki’l-karz istidâne ve kabz eylediği yüz elli guruş deyni mukābelesinde medîne-i mezbûrede Kefçe mahallesinde vâki‘ ma‘lûmü’l-hudûd bir bâb dükkânını vefâen bana bey‘ ü teslîm edip hatta meblağ-ı merkūm bana ber-vech-i muharrer deyni olduğunu ikrâr ve mûcebince işbu bir kıt‘a deyn temessüğü dahi yedime i‘tâ etmekle dükkân-ı mezkûru rehniyetden fekk birle meblağ-ı merkūm yüz elli guruşu bana teslîme mezbûr diğer es-Seyyid Mustafa’ya tenbîh olunmak matlûbumdur deyü da‘vâ ve mezbûr diğer es-Seyyid Mustafa cevâbında temessük-i mezkûru ikrâr lâkin deynim ancak elli guruş olup müdde‘î-i mezbûrun ziyâde müdde‘âsı olan yüz guruşu kâziben ikrâr etmiş idim deyü def‘ eyledikde mezbûr diğer es-Seyyid Mustafa ziyâde yüz guruş deyni olduğunu ikrârında kâzib olmadığına bi’t-taleb müdde‘î-i mezbûr es-Seyyid Mustafa gıbbe’t-tahlîfi’ş-şer‘î mûcebiyle meblağ-ı merkūm yüz elli guruşu müdde‘î-i mezbûr es-Seyyid Mustafa’ya ba‘de’l-edâ, dükkân-ı mezkûru rehniyetden fekk etmek üzere mezbûr diğer es-Seyyid Mustafa’ya tenbîh olunduğu bi’l-iltimâs huzûr-ı âlîlerine i‘lâm olundu. Fî-gurrei Z sene 1205