Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 502 Hüküm no: 757 Orijinal metin no: [62b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeynep bt. Mehmed’in Saliha bt. Hasan’a olan borcunu kefaletinden dolayı Hatice bt. Mustafa’nın ödemesi Ma‘rûz; Medîne-i Üsküdar’da Vâlide-i Atik mahallesinde sâkine mu‘arrefetü’z-zât Saliha bt. Hasan nâm hatun medîne-i mezbûrede mahfil-i bâbda meclis-i şer‘-i hatîrde kezâlik zâtı mu‘arrefe Hadice bt. Mustafa nâm hatun mahzarında târih-i i‘lâmdan üç sene mukaddem mezbûre Hadice Hatun’un gelini gāibetü ani’l-meclis Zeyneb bt. Mehmed nâm hatun yedimden ve mâlımdan beheri on beşer guruşa olmak üzere iştirâ ve kabz eylediği iki penbe hilâlîsi gömlek semeninden zimmetinde olan otuz guruş hakkıma mezbûre Hadice hatun tarafeynden bi’l-emr ve’l-kabûl kefîl ve dâmine olmağla kefâletine binâen meblağ-ı merkūmu mezbûre Hadice Hatun’dan taleb ederim deyü ba‘de’d-da‘vâ ve’l-ikrâr lâkin meblağ-ı merkūmu hâlen edâya iktidârı olmayıp tecîl ve taksîte tâlibe olmağın müdde‘iye-i mezbûre dahi meblağ-ı merkūmun beş guruşunu târih-i kitâbdan üç ay tamamında bâkī yirmi beş guruşunu dahi beher şehr altmışar paradan on altı ay yirmi gün ki cem‘an on dokuz ay yirmi gün tamamında kendiye edâ etmek üzere mezbûre Hadice Hatun’u tecîl ve taksît eylediğimde ol dahi ber-vech-i muharrer müeccelen ve mukāssatan edâya ta‘ahhüd edip bu vech üzere kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 27 min-Za sene 1205