Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 503 Hüküm no: 758 Orijinal metin no: [62b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yusuf Ağa’nın Tuzcular Kethudası Mehmed Ağa’ya olan borcunu taksitle ödemesi Ma‘rûz; Mahmiye-i İslâmbol’da Zindankapısı kurbünde sâkin Tuzcular Kethudâsı Mehmed Ağa b. Ali nâm kimesne medîne-i Üsküdar’da mahfil-i bâbda meclis-i şer‘-i hatîrde Sâbıkā Şehzâde Câmi‘-i şerîfi’nin kāimmakām mütevellîsi Yusuf Ağa b. Hasan nâm kimesne mahzarında mezbûr Yusuf Ağa târih-i i‘lâmdan dört sene mukaddem yedimden iştirâ ve kabz eylediği vezn ve fiyâtı beynimizde ma‘lûm tuz semeninden bâkī zimmetinde elli üç guruş hakkım olmağla hâlâ taleb eylediğimde ol dahi zimmetinde bana meblağ-ı bâkī-i merkūm elli üç guruş deyni olduğunu ikrâr edip lâkin def‘aten edâya kudreti olmayıp târih-i i‘lâmdan beher şehr tamamında onar guruş verip cem‘an beş ay tamamına değin edâ etmek üzere tecîl ve taksîte tâlibe olmağla ben dahi ber-vech-i muharrer tecîl ve taksît eylediğimde mezbûr Yusuf Ağa dahi meblağ-ı bâkī-i merkūm elli üç guruşu ber-minvâl-i muharrer mukāssatan ve müeccelen edâya ta‘ahhüd eyledi deyü takrîrini mezbûr Yusuf Ağa ba‘de’t-tasdîk bi’l-iltimâs huzûr-ı âlîlerine i‘lâm olundu. Fî 3 min-Z sene 1205