Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 505 Hüküm no: 764 Orijinal metin no: [62b-8] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Molla Eyüb ile Fatma Hanım’ın Ümmügülsüm’e olan borçlarını ödemeleri Ma‘rûz; Medîne-i Üsküdar’a muzâfe Yoros nâhiyesine tâbi‘ Kanlıcak karyesinde sâkine Ümmügülsüm nâm sagīrenin babası ve vasîsi sâhib-i arzuhâl el-Hâc Mehmed Emin b. Hasan nâm kimesne medîne-i mezbûrede meclis-i şer‘-i hatîrde yine karye-i mezbûre sükkânından arzuhâlde isimleri mezkûr Molla Eyüb b. Halil ile zâtı mu‘arrefe Fatıma bt. Mustafa nâm hatun mahzarında kızım sagīre-i mezbûrenin mâl-ı mevrûsundan olmak üzere mezbûr Molla Eyüb bundan akdem bâ-temessük yedimden istidâne ve kabz eylediği doksan iki guruş ve mezbûre Fatıma Hatun dahi kezâlik bâ-temessük yedimden istidâne ve kabz eylediği otuz dört buçuk guruş ki cem‘an yüz yirmi altı buçuk guruşu mezbûrândan bi’l-vesâye taleb ederim deyü takrîrine mutâbık iki kıt‘a deyn temessüğü ibrâzıyla ba‘de’d-da‘vâ ve’l-istintâk ve’l-ikrâr mûcebiyle deyn-i meblağ-ı mecmû‘-ı merkūm yüz yirmi altı buçuk guruşu sagīre-i mezbûre içün vasî-i mezbûra edâsıyla mezbûrân Molla Eyüb ve Fatıma’dan her biri şer‘an ilzâm olunduğu bi’l-iltimâs huzûr-ı âlîlerine i‘lâm olundu. Fî 29 min-Za sene 1205