Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 506 Hüküm no: 765 Orijinal metin no: [63a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uzun süredir haber alınamayan Mehmed Emin’in terekesinin taksimi yapıldıktan sonra sağ olup olmadığı hakkında gerekli tahkikatın yapılması Ma‘rûz; Medîne-i Üsküdar hâricinde Göçbeyli Çiftliği’nde sâkin iken on bir aydan beri gayb-ı munkatı‘a ile gāib olan Mehmed Emin b. Hüseyin’in verâseti ancak li-ebin karındaşı sagīr Ahmed ile li-ebin kız karındaşı sagīre Münevvere’ye münhasıra olduğu tahakkukundan sonra sagīrân-ı mezbûrân Ahmed ve Münevvere’nin li-ebeveyn ammileri ve vasîleri sâhib-i arzuhâl Bostanî Hasan b. Halil nâm kimesne meclis-i şer‘-i hatîrde izzetlü bostancıbaşı ağa tarafından ta‘yîn olunan haseki ma‘rifetiyle ahz ve meclis-i şer‘a ihzâr olunan gāib-i mezbûrun çiftlik-i mezkûrda şerîki Bostanî Mehmed b. Abdullah ile çiftlik-i mezkûr hademesinden arzuhâlde mezkûr Sava v. Panayot ve diğer Sava v. Nikola ve Sotko v. Todori ve İstiko v. Pagon muvâcehesinde gāib-i mezbûr Mehmed Emin çiftlik-i mezkûrda sâkin iken merkūmûndan her biri mâlına cem‘ birle kendiyi katl ve meyyitini tağyîb etmişler idi deyü mesmû‘um olmağla merkūmundan her biri istintâk ve hakīkat-i hâli istikşâf olunmak murâdımdır dedikde ağa-yı mûmâ-ileyh re’y [ve] ma‘rifetiyle ba‘de’l-istintâk meclis-i şer‘de dahi bi’d-defa‘ât gāib-i merkūmun hâl-i keyfiyetinden merkūmûndan her biri suâl olundukda bi’l-külliye inkârlarıyla cevâb verdiklerinde gāib-i merkūmun hâli mütebeyyin olmamağla hâli mütebeyyin oluncaya değin lede’l-iktizâ merkūmûn huzûr-ı hükkâma ihzârları içün vasî-i mezbûr Hasan merkūmûndan kefîl taleb eyledikde hâzır bi’l-meclis Yeniköy Kethudâsı Hıristo v. Yanaki nâm zimmî ile şerîki mezbûr Bostanî Mehmed merkūmûnun nefislerine ve hîn-i mutâlebede huzûr-ı hükkâma ihzârlarına her biri kefîl olduklarından mâ‘adâ merkūmûndan her biri dahi âharın nefsine ve ihzârına tekeffül ve ta‘ahhüd eylediklerinde vasî-i mezbûr dahi râzı olup bu vechile vasî-i mezbûrun müdde‘âsı gāib-i mezbûrun hâli mütebeyyin olmasına tevkīf olunup kat‘-ı münâza‘a eyledikleri mübâşiri merkūm iltimâsıyla huzûr-ı âlîlerine i‘lâm olundu. Fî 28 min-Şevvâl sene 1205