Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 435 Hüküm no: 456 Orijinal metin no: [104b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ferman-ı âlî hilafına sarımsaklı ve sirkeli işkenbe çorbası pişiren aşçı esnafından Pano’nun bu işten men olunduğu Bâ-mühr-i hazret-i efendi. Ma‘rûz. Arzuhâl eden işkenbeci esnâfı Eyüp kazâsına tâbi‘ kasaba-i Hasköy’de Pîrîpaşa Mahallesi’nde aşçı olan Pano nâm zimmî muvâcehesinde merkūm Pano aşçı tâifesinden olmağla yedimizde olan fermân-ı âlî mantûkunca sirkeli ve sarımsaklı işkenbe çorbası tabh ve bey‘inden men‘ olunmuşlar iken hilâf-ı fermân-ı âlî tabh ve bey‘ eder deyü men‘ini iltimâs ve yedlerinde olan emr-i şerîfi ibrâz edip nazar olundukda fi’l-vâki‘ işkenbeci yeniçeri ocağında olan zağarlara kifâyet mikdârı işkenbe verip bu mukābelede aşçı tâifesi sirkeli ve sarımsaklı işkenbe çorbası tabh ve bey‘inden men‘ olunduklarını nâtık bulunmağın ber-mûceb-i emr-i âlî mezbûr Pano zimmî sirkeli ve sarımsaklı işkenbe çorbası tabh ve bey‘inden men‘ olunduğu huzûr-ı âlîlerine i‘lâm olundu. El-emru li-men-lehü’l-emr. Fî 27 Safer sene [1]143.