Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 510 Hüküm no: 774 Orijinal metin no: [63b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Evlonya bt. Anaştaş’ın boşandığı kocasından nafaka almak üzere karar verildiği yolundaki iddiasını ispatlayamadığı Ma‘rûz; Mahmiye-i İslâmbol hısnı ebvâbından Edirnekapısı dâhilinde mütemekkine ve şahsı mu‘arrefe Evlonya bt. Anaştaş nâm Nasrâniye medîne-i Üsküdar’da mahfil-i bâbda meclis-i şer‘-i hatîrde zevc-i sâbıkı Yani v. Panşo nâm zimmî muvâcehesinde ben merkūm Yani zimmînin zevce-i medhûlün-bihâsı iken târih-i i‘lâmdan iki sene mukaddem beni tatlîk etmekle merkūmun firâşından hâsıl ve benden mütevellid[e] işbu hâzıratü bi’l-meclis sadriye kızım Anasonya nâm sagīrenin mâlı olmayıp nafakaya muhtâce olmağla sagīre-i mersûmenin nafakası içün târih-i i‘lâmdan dokuz ay mukaddem babası merkūm Yani zimmî üzerine kıbel-i şer‘den külle yevm sekizer para nafaka ve kisve-bahâ farz ve takdîr ve yedime hüccet-i şer‘iye i‘tâ olunmuş idi el-hâletü hâzihî işbu târih-i i‘lâma gelince sagīre-i mezbûrenin nafaka-i mukadderesinden babası merkūm Yani zimmî zimmetinde müctemi‘ dokuz aylık elli dört guruşu merkūm Yani zimmîden bi’l-hıdâne taleb ederim deyü da‘vâ, ol dahi cevâbında fi’l-hakīka müdde‘iye-i mersûme zevcesi olup ber-vech-i muharrer tatlîkini ve sagīre-i mersûme sulbiye kızı olduğunu ikrâr lâkin nafaka takdîr olunduğunu inkâr etmeğin müdde‘iye-i mezbûre ber-vech-i muharrer müdde‘âsını isbât içün bi’d-defa‘ât ba‘de’l-istimhâl ve’l-imhâl müddet-i mehl-i şer‘î tamam olup müdde‘âsını bir vechile isbâta kādir[e] olmayıp tahlîfe dahi tâlibe olmamağla mûcebiyle müdde‘iye-i mezbûre da‘vâ-yı mezkûresiyle merkūm Yani zimmîye bilâ-beyyine mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 25 min-L sene 1205