Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 512 Hüküm no: 777 Orijinal metin no: [63b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgi v. Yani’nin kardeşi İlya’dan para talep edip hibe ettiği eşyasını geri alma davasının geçerli olmadığı Ma‘rûz; Medîne-i Üsküdar’a tâbi‘ Çenger karyesinde mütemekkin Yorgi v. Yani nâm zimmî medîne-i mezbûrede mahfil-i bâbda meclis-i şer‘-i hatîrde li-ebeveyn er karındaşı İlya nâm zimmî muvâcehesinde ben ücretle hizmet eder makūlesinden olup târih-i i‘lâmdan bir sene mukaddem karındaşım merkūmun talebiyle karye-i mezbûrede vâki‘ şerbethânesinde kendiye beher şehr beşer guruş ücret kavliyle dört ay hizmet etmemle şühûr-ı mezkûrede müstehakk olduğum yirmi guruş ecr-i müsemmâmın beş guruşunu yedinden ahz bâkī on beş guruşu zimmetinde kaldığından mâ‘adâ bundan mukaddem emlâkimden yirmi guruş kıymetli bir çuka şalvarımı dahi karındaşım İlya zimmîye hibe ve temlik ve teslîm etmemle meblağ-ı merkūm on beş guruşu ve hibemden rücû‘ birle zikr olunan çuka şalvarımı merkūm İlya zimmîden taleb ederim deyü da‘vâ ol dahi cevâbında müdde‘î-i merkūm Yorgi zimmî ancak bana bir ay hizmet etmiş idi deyü ziyâde üç ay hizmetini inkâr etmeğin müdde‘î-i merkūmun karındaşı merkūmdan hibeden rücû‘ da‘vâsı meşrû‘a olmayıp müdde‘î-i merkūm Yorgi zimmîye ber-vech-i muharrer ziyâde ücret da‘vâsını beyândan izhâr-ı acz edip tahlîfe dahi tâlib olmamağla mûcebiyle müdde‘î-i merkūm Yorgi zimmî eylediği ziyâde da‘vâsıyla merkūm İlya zimmîye bilâ-beyyine mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 29 min-Za sene 1205