Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 515 Hüküm no: 784 Orijinal metin no: [64a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Panayot v. Aleksan’ın Luka v. Yani’den alacaklı olduğu yolundaki davasına itibar edilmediği Ma‘rûz; Medîne-i Üsküdar’a tâbi‘ Kādı karyesinde mütemekkin Panayot v. Aleksan nâm zimmî medîne-i mezbûre bâb mahkemesinde meclis-i şer‘-i hatîrde Luka v. Yani nâm zimmî muvâcehesinde merkūm Luka zimmînin karye-i mezbûrede vâki‘ mâlik olduğu bir bâb şerbethânesi taht-ı icâremde iken bundan akdem şerbethâne-i mezkûreyi bi’l-iktizâ ta‘mîr esnâsında merkūm Luka zimmî tarafından ta‘yîn eylediği gāib ani’l-meclis Petro zimmînin emriyle amele ve sâir mesârif-i müteferrikasına elli buçuk guruş sarf etmemle şerbethâne-i mezkûre merkūm Luka zimmînin olup gāib-i merkūm Petro zimmî dahi kendi mu‘temedi olduğuna binâen gāib-i merkūm Petro zimmîyi ihzâr eylesin yâhûd meblağ-ı merkūm elli buçuk guruşu merkūm Luka zimmî kendi mâlından bana edâ eylesin deyü takrîri üzere tasaddî eylediği da‘vâ-yı meşrûhasına iltifât olunmayıp merkūm Panayot zimmî bî-vech mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 7 min-Z sene 1205