Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 516 Hüküm no: 787 Orijinal metin no: [64a-8] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yoseb v. Yani’nin Mehmed b. Ahmed’e sattığı atın kusurlu olduğunun tespit edildiğinden satışın geçersiz olduğu Ma‘rûz; Medîne-i Üsküdar’da Vâlide-i Atik mahallesinde sâkin Mehmed b. Ahmed medîne-i Üsküdar mahkemesinde meclis-i şer‘-i hatîrde Yosep v. Yani nâm zimmî muvâcehesinde târih-i i‘lâmdan dört gün mukaddem işbu mu‘âyene olunan bir re’s doru bârgirini cemî‘ uyûbdan sâlime olmak üzere kırk guruşa bana bey‘ ve teslîm ben dahi iştirâ etmiş idim lâkin zikr olunan bârgirin inde’t-tüccâr noksân-ı semen îcâb eder kadîm solugan illeti ile mu‘ayyeb olmağla zikr olunan bârgiri red ve meblağ-ı merkūmu bana teslîme tenbîh olunmak matlûbumdur deyü da‘vâ ve merkūm Yoseb zimmî cevâbında zikr olunan bârgiri cemî‘ uyûbdan sâlime olmak üzere kırk guruşa bey‘ini ikrâr ve ayb-ı mezkûru inkâr etmeğin zikr olunan bârgir ehl-i hibreye irâe olundukda ayb-ı mezkûr ile mu‘ayyeb ve ayb-ı mezkûr kadîm olduğunu Abdi Ağa b. Hasan ve Hasan Ağa b. Ali nâm kimesneler ba‘de’l-ihbâr ve’l-half mûcebiyle zikr olunan bârgiri red ve meblağ-ı merkūm kırk guruşu müdde‘î-i merkūma edâ ve teslîme merkūm Yosep zimmîye şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 18 min-L sene 1205