Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 516 Hüküm no: 788 Orijinal metin no: [64b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hanım’ın diğer Ayşe Hanım’daki alacaklarına Zeynep bt. Bekir’in kefil olduğu Ma‘rûz; Medîne-i Üsküdar’da Davudpaşa mahallesinde sâkine ve zâtı mu‘arrefe Âişe bt. Mehmed nâm hatun meclis-i şer‘-i hatîrde kezâlik zâtı mu‘arrefe diğer Âişe bt. el-Hâc Ömer nâm hatun mahzarında mezbûre diğer Âişe Hatun zimmetinde cihet-i deyn-i şer‘îden bâ-temessük beş yüz guruş alacak hakkım olup târih-i i‘lâmdan üç ay mukaddem deyn-i merkūmu taleb eylediğimde hâlen ve def‘aten edâya kudretim yokdur deyü tecîle tâlibe oldukda ben dahi beher şehr yirmişer guruş vermek üzere tecîl eylediğimde ol dahi müeccelen edâya ta‘ahhüd etmiş iken hâlâ üç ay mürûruyla eceli hulûl eden altmış guruş hakkımı taleb ederim deyü da‘vâ ve mezbûre diğer Âişe Hatun cevâbında fi’l-hakīka cihet-i mezkûreden müdde‘iye-i mezbûreye beş yüz guruş deynini ve ber-vech-i muharrer edâya ta‘ahhüdünü ikrâr lâkin deyn-i mezkûr mukābelesinde rehin olmak üzere emlâkimden kıymetleri beş yüz doksan guruşa bâliğ bir yâkut yüzük ve bir elmas yüzük ve bir elmas iğne ve bir incili tarak kesesi ve bir çârşâl ve yirmi bir rub‘iye ve sekiz İslâmbol nısfiyesini yedine teslîm etmemle rihân-ı mezkûreyi taleb ederim deyü da‘vâ ve beynlerinde ba‘de-vukū‘ı’l-münâza‘a bâ-tavassut-ı muslihîn mezbûre diğer Âişe rihân-ı mezkûre da‘vâsından meccânen fâriğa ve mutâlebesinden müdde‘iye-i mezbûre Âişe Hatun’un zimmetini ibrâ ve ıskāt eyledikde ol dahi ibrâsını kabûl edip müdde‘iye-i mezbûre Âişe hatun deyn-i meblağ-ı mezkûr beş yüz guruşu târih-i kitâbdan beher şehr tamamında onar guruşdan elli ay tamamında edâ etmek üzere mezbûre diğer Âişe Hatun’u tecîl ve taksît eyledikde ol dahi ber-vech-i muharrer müeccelen ve mukāssatan edâya ba‘de’t-ta‘ahhüd işbu hâzıratü bi’l-meclis vâlidesi Zeyneb bt. el-Hâc Bekir nâm hatun dahi meblağ-ı müeccel-i merkūma ber-vech-i muharrer bi’l-emr ve’l-kabûl kefîl ve dâmine olup bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 24 min-Zilka‘de sene 1205