Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 517 Hüküm no: 789 Orijinal metin no: [64b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Koyun Tüccarı Mustafa’nın kendisini silahla yaralayan Dimitri v. Hıristo ile otuz altı kuruş karşılığında anlaştığı Ma‘rûz; Koyun cellâbından Mustafa b. Ali meclis-i şer‘-i hatîrde medîne-i Üsküdar’a tâbi‘ Kādı karyesinde mütemekkin Dimitri v. Hıristo nâm zimmî muvâcehesinde târih-i i‘lâmdan on gün mukaddem karye-i mezbûre civârında koyun ra’y ederken beş re’s koyunum merkūm Dimitri zimmînin bağına girip ihrâc içün bağ-ı mezkûra duhûl eylediğimde merkūm Dimitri zimmî bi-gayrı hakkın amden piştov kurşunuyla sağ ayağımın topuğu üzerinden darb ve cerh etmekle mûcib-i şer‘îsi merkūm Dimitri zimmîden taleb ederim deyü eylediği da‘vâsından bâ-tavassut-ı muslihîn otuz altı guruş bedel-i makbûz mukābelesinde merkūm Dimitri zimmî ile an-inkârin sulh olup cerh-i mezkûra ve mâ-yuhdesü minhe müte‘allika âmme-i de‘âvîden merkūm Dimitri zimmînin zimmetini ibrâ ve ıskāt eyledikde ol dahi bedel-i sulh nâmıyla müdde‘î-i mezbûra medfû‘ı olan otuz altı guruşa müte‘allika âmme-i de‘âvîden müdde‘î-i mezbûrun zimmetini ibrâ ve ıskāt ve her biri ber-vech-i muharrer âharın ibrâsını kabûl edip bu vechile kat‘-ı münâza‘a eyledikleri bi’t-terâzî Üsküdar mahkemesinde tescîl ve bi’l-iltimâs huzûr-ı âlîlerine i‘lâm olundu. Fî 13 min-Z sene 1205