Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 518 Hüküm no: 790 Orijinal metin no: [64b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arpacı ve duhâncı esnaf temsilcilerinin kanuna aykırı zahire satanların cezalandırılması talebinde bulundukları Ma‘rûz; Medîne-i Üsküdar’da arpacı ve hancı esnâfının kethudâları es-Seyyid Bekir b. Veli ve İbrahim b. Bekir ve esnâfından es-Seyyid Mustafa b. Ali ve es-Seyyid Mehmed b. Receb ve Ömer b. Ali ve es-Seyyid Hüseyin b. Mustafa ve Mehmed Emin b. Ömer ve Mahmud b. Mehmed ve Mehmed b. Mustafa ve diğer Mehmed b. Mahmud yine medîne-i mezbûrede bakkāl esnâfının pazarbaşıları es-Seyyid Mustafa b. es-Seyyid Mehmed ve ustalarından es-Seyyid el-Hâc İbrahim b. es-Seyyid Ahmed ve es-Seyyid Mustafa b. Hasan ve Musa b. Veli ve Salih b. Mahmud nâm kimesneler ile zimmî ustalarından Ananosti v. Nikola ve Dimitri v. Hıristo ve Yanaki v. Dimo ve Nikola v. Karaca ve Kostanti v. Yani ve Nikola [v.] Yani ve Antimoz v. Vasil ve Nikola v. Manol ve Arhondi v. Sünbül nâm zimmîler meclis-i şer‘-i hatîrde medîne-i mezbûrede Kefçe mahallesinde vâki‘ Dârüssa‘âde Ağası Çeşmesi kurbünde Bakkāl Dimitri v. Yorgi ve şerîki Sava v. Anaştaş nâm zimmîler muvâcehelerinde Âsitâne-i aliyye ve medîne-i mezbûrede mevcûd ibâdullâhın zehâiri berren ve bahren taşra ile nakl ile itlâf ve izâ‘at olunmak memnû‘âtdan ve telefine bâdî olan kimesne tedîb olunur iken merkūmân Dimitri ve Sava dükkânlarında bakkāllık ticâretine kanâ‘at etmeyip tama‘-ı hâmlarında nâşi dükkânları ittisâline memnû‘âtdan olan han misillü kebîr ahur binâ ve inşâ ve ba‘zı yolcuları iskân ve bu takrîb ile arpa ve pirinç ve sabun misillü zehâiri hufyeten taşraya nakl ve itlâf ve medîne-i mezbûreye etrâf-ı nevâhîden yükcüler ile gelen yumurta ve tavuk ve tereyağını dahi medîne-i mezbûreye bir sâ‘at bu‘dı olan mahâlden yükcülerin önüne geçip ikişer ve üçer para ziyâde bahâ ile iştirâ ve hufyeten Galata’da Beyoğlu nâm mahâlde Efrenc tâifesine bey‘ ve itlâf ve bu vechile zehâirin telef ve izâ‘ati Âsitâne-i aliyye’de muhâfazaya memûr olan zâbitân taraflarından Üsküdar’dan taşraya zehâir kaçırırlar imiş deyü medîne-i mezbûreye zehâir naklinden men‘ ve cümle ibâdullâhın muzâyakalarına bâdî olmağla bi’d-defa‘ât dükkânları[nı]zda olan ticâretinize kanâ‘at edin bu misillü memnû‘âtı irtikâb etme[yin] deyü merkūmâna nush ü pend eylediğimizde aslâ kabûl etmeyip ef‘âl-i sâbıkā-i memnû‘alarında isrâr ve merkūmândan cümlemizin emniyetlerimiz meslûb olmuşdur deyü muvâcehelerinde ihbâr ve fî-mâ ba‘d bu misillü memnû‘âtı mürtekib olup cümleye mazarratı olan kimesne esnâfımızdan ihrâc ve mazarratı cümle üzerinden def‘ buyurulmak bâbında fermân-ı âlîleri sudûrunu her biri istirhâm ve istid‘â eyledikleri bi’l-iltimâs huzûr-ı âlîlerine i‘lâm olundu. Fî 29 min-Şevvâl sene 1205