Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 519 Hüküm no: 791 Orijinal metin no: [64b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sütçü İstanco’nun Mehmed Emin ve oğlu Ömer’deki alacakları hakkında anlaştığı Ma‘rûz; Sütcü tâifesinden İstanco v. Yosep nâm zimmî medîne-i Üsküdar’da mahfil-i bâbda meclis-i şer‘-i hatîrde Kaymakcı Mehmed Emin b. Ömer ve sulbî oğlu ile terâfu‘larında bundan akdem mezbûr Mehmed’in beher yevm onar para ücret kavliyle kendiye on bir ay hizmet etmemle müddet-i mezkûrede zimmetinde müctemi‘a olan müstehak olduğum ücretimden bâkī seksen iki buçuk guruş ve bârgir semeninden bâkī dört guruş ki cem‘an seksen altı buçuk guruşu ve oğlu mezbûr Ömer zimmetinde on beş guruş cihet-i karzdan ve bârgir ve saman semeninden on yedi buçuk guruş ki cem‘an ikisinin zimmetinde hâlâ yüz otuz beş guruş hakkım olmağla mezbûrândan taleb ederim deyü eylediği da‘vâsından bâ-tavassut-ı muslihîn mezbûrân Mehmed Emin ve oğlu Ömer ile elli yedi guruş bedel-i makbûza sulh olup ziyâde müdde‘âsına ve husûs-ı mezkûra müte‘allika âmme-i de‘âvîden mezbûrân Mehmed Emin ve Ömer’den her birinin zimmetlerini ba‘de’l-ibrâ ve’l-kabûl kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 24 min-Za sene 1205