Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 519 Hüküm no: 793 Orijinal metin no: [65a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kıbti Salih’in karısıyla iyi geçinmeye söz verdiği Ma‘rûz; Medîne-i Üsküdar’da Solaksinan mahallesinde sâkine ve şahsı mu‘arrefe Ümmühani bt. Hasan nâm Kıbtiye medîne-i mezbûrede mahfil-i bâbda meclis-i şer‘-i hatîrde hâlâ zevci Salih b. Mustafa nâm Kıbtî muvâcehesinde ben mezbûr Salih’in dâimâ rızâsında hüsn-i mu‘âşeret üzere iken mezbûr Salih bi-gayrı hakkın bana mûcib-i ta‘zîr olur elfâz-ı kabîha ile şetm ve dâimâ tekdîr ve ta‘cîzden hâlî olmamağla suâl olunup benimle hüsn-i mu‘âşeret edip beni şetm ve tekdîr etmemek üzere zevcim mezbûra tenbîh olunmak matlûbumdur deyü da‘vâ eyledikde ol dahi zevcesi müdde‘iye-i merkūmeye hilâf-ı şer‘-i şerîf nesne söylemeyip ve bundan böyle hüsn-i mu‘âşeret etmek üzere ta‘ahhüd edip bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 7 min-Z sene 1205