Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 520 Hüküm no: 794 Orijinal metin no: [65a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali b. Abdullah’ın Hafız Yusuf Ağa’daki alacaklarını tahsil ettiği Ma‘rûz; Medîne-i Üsküdar’da Kefçe mahallesinde sâkin sâhib-i arzuhâl Ali b. Abdullah nâm Zenci medîne-i mezbûrede mahfil-i bâbda meclis-i şer‘-i hatîrde arzuhâlde ismi mezkûr Hafız Yusuf Ağa b. el-Hâc Hüseyin nâm kimesne mahzarında ben ücret ile hizmet eder makūleden olmamla beher şehr onar guruş ücret kavliyle mezbûr Hafız Yusuf Ağa’ya vilâyet-i Anadolu’da Amasya sancağında vâki‘ taht-ı iltizâmında olan Hacıköyü nâm kasabada ve medîne-i mezbûrede menzilinde târih-i i‘lâma gelince on beş ay hizmet etmemle şühûr-ı mezkûrede zimmetinde müctemi‘ olan yüz elli guruş hakkımın elli yedi buçuk guruşunu yedinden ahz ü kabz ve doksan iki buçuk guruşu bâkī zimmetinde kalmağla taleb ederim deyü eylediği ücret da‘vâsından üç guruş bedel-i makbûza mezbûr Hafız Yusuf Ağa ile sulh olup husûs-ı mezkûra ve hukūk-ı sâireye müte‘allika âmme-i de‘âvîden mezbûr Hafız Yusuf Ağa’nın zimmetini ibrâ eyledikde ol dahi müdde‘î-i merkūma kendiye hizmeti esnâsında medfû‘u olan beynlerinde ma‘lûm on sekiz guruş kıymetli eşyâ-i mütenevvi‘aya müte‘allika âmme-i de‘âvîden mezbûr Ali’nin zimmetini ibrâ ve ıskāt ve her biri âharın ber-vech-i muharrer ibrâsını kabûl edip kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 13 min-Z sene 1205