Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 520 Hüküm no: 795 Orijinal metin no: [65a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hanım ve gelini Ayşe’nin bulundukları mahalleden çıkarılmaları Ma‘rûz; Medîne-i Üsküdar’da Kādıasker mahallesi imâmı Mehmed Efendi b. Osman ve ahâlisinden Ahmed b. Süleyman ve Bostanî Ali Beşe b. Salih ve Osman Efendi b. Salih ve Molla Hasan b. Salih ve Osman b. Ahmed ve Hasan Ağa b. Süleyman ve Halil b. Ömer nâm kimesneler medîne-i mezbûrede mahfil-i bâbda meclis-i şer‘-i hatîrde bundan akdem bâ-fermân-ı âlî medîne-i mezbûreden nefy ü iclâ olunup bilâ-ıtlâk mahalle-i mezbûreye gelip mutavattınlar olan zâtları mu‘arrefe Âişe bt. Ahmed ile gelini diğer Âişe bt. Abdullah mahzarında mezbûretân Âişe ve diğer Âişe kendi hâllerinde olmayıp her birileri hadîdü’l-lisân ve dâimâ bizlere şutûm-ı galîza ile şetm ve hetk-i ırz etmeleriyle bi’d-defa‘ât kendilerine nush ü pend eylediğimizde mütenassıhalar olmayıp harekât-ı nâ-marzıyyelerinde ısrâr etmeleriyle kendilerden bi’l-külliye emn ü rahatımız meslûb olmuşdur deyü her biri muvâcehelerinde da‘vâ ve fî-mâ ba‘d mahalle-i mezbûreden ihrâc olunmak bâbında fermân-ı âlîleri sudûrunu her biri istid‘â ve istirhâm eyledikleri bi’l-iltimâs huzûr-ı âlîlerine i‘lâm olundu. Fî 6 min-Zilhicce sene 1205