Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 523 Hüküm no: 800 Orijinal metin no: [65b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Suyolcuların görevi olan acı su kuyusu açma işine yapılan müdahalenin men edilmesi Ma‘rûz; Mahmiye-i İslâmbol ve etrâfında olan lağımcı esnâfının kethudâları Mustafa b. Mehmed ve yiğitbaşıları Musa b. Ali nâm kimesneler medîne-i Üsküdar’da mahfil-i bâbda meclis-i şer‘-i hatîrde medîne-i mezbûrede Suyolcu Simyon v. Dimo ve Londi v. Dimo nâm zimmîler muvâcehelerinde ez-kadîm gerek menâzil ve gerek bostan ve gerek hamam içün acı su kuyuları hafrı lağımcı esnâfına mahsûs ve mahâll-i mezkûrede mâ-i lezîz lağımlarını hafretmek suyolcu tâifesine mahsûs olup ve her birimiz âharın umûruna müdâhale etmeyip işbu nizâm beynimizde mer‘î ve mu‘teber olup bu vechile amel olunmak üzere yedimize tuğrâ-yı garrâ ile mu‘anven emr-i âlî-şân dahi i‘tâ olunmuş iken merkūmân Simyon ve Londi zimmîler medîne-i mezbûreye tâbi‘ Kuzguncuk karyesinde menzillerinde bir aded ve Saraf zimmî menzilinde bir aded ve Francalacı Yorgi zimmînin menzilinde bir aded ki cem‘an üç aded acı su kuyusu hafrına mübâşeret birle nizâm-ı kadîmimizin ihtilâline bâ‘is ü bâdî olmalarıyla bu makūle hilâf-ı nizâm ve şurût-ı mer‘î harekâtları def‘ u men‘ olunmak matlûbumuzdur deyü tasaddî eyledikleri da‘vâlarında merkūmân Simyon ve Londi zimmîler dahi ber-vech-i muharrer müdâhale ve harekâtlarını inkârıyla beynlerinde ba‘de-vukû‘ı’l-münâza‘a bâ-tavassut-ı muslihîn esnâf-ı mezkûre merkūmânın hafr eyledikleri üç aded kuyuları tekmîline bi’r-rızâ izin ve ruhsat verip onlar dahi zikr olunan üç aded kuyudan mâ‘adâ hilâf-ı nizâm ve mugāyir-i şurût acı su kuyusu hafr etmemek üzere her biri ta‘ahhüd ve esnâf-ı mezkûre dahi râzılar olup bu vecihle beynleri ıslâh olunduğu bi’l-iltimâs huzûr-ı âlîlerine i‘lâm olundu. Fî 4 min-Z sene 1205