Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 523 Hüküm no: 801 Orijinal metin no: [65b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Takor v. Toros’un evinin komşusu Mehmed Ağa’nın evine verdiği zararın giderilmesi Ma‘rûz; Sâdır olan fermân-ı âlîlerine imtisâlen kıbel-i şer‘den Mustafa Efendi dâ‘îleri ve hâssa mi‘mârı hulefâsından Halil Reşid ve es-Seyyid Hüseyin ile medîne-i Üsküdar’da Reis mahallesinde vâki‘ sâhib-i arzuhâl Mehmed Ağa b. Ahmed’in sâkin olduğu menzile varıp mazbûtü’l-esâmî Müslimîn huzurlarında akd-i meclis-i şer‘-i şerîf etdikde arzuhâlde ismi mezkûr Tekor v. Toros tarafından vekîli sulbî oğlu Kirope nâm zimmî muvâcehesinde müvekkil-i merkūm Tekor zimmî işbu akd-i meclis-i şer‘ olunan menzilim karşısında kâin atik menzilini hedm ve müceddeden binâ ve inşâ edip lâkin menzil-i mezkûrun pencerelerinden benim menzilimin makarr-ı nisvân olan mevâzi‘ine nezâreti olup zarar-ı şer‘îsi olmağla men‘ u def‘ olunmak matlûbumdur deyü da‘vâ ve mi‘mârân-ı mezbûrân ve sâir ehl-i vukūf ile müvekkil-i merkūmun müceddeden binâ eylediği menziline varıp nazar eylediklerinde fi’l-hakīka menzil-i mezkûrun fevkānî odasının beş aded penceresinden ve dehlizinden müdde‘î-i mezbûrun menziline nezâreti olup zarar-ı şer‘îsi olduğu zâhir ve ber-vech-i muharrer zarar-ı şer‘îsi olduğuna binâen müvekkil-i merkūm târih-i i‘lâmdan mukaddem zikr olunan pencereleri dolma duvar ile sedd ve zikr olunan dehlizin önüne tahta perde binâsıyla havâle-i zararını def‘ edip zikr olunan dehlizin tahta perdesi münhedim olur ihtimâliyle dehlizi dahi dolma duvar ile sedd edip bi’l-külliye havâle-i zararını def‘a vekîl-i merkūm Kirope zimmî ta‘ahhüd edip kat‘-ı münâza‘a eyledikleri ba‘de’l-inhâ bi’l-iltimâs huzûr-ı âlîlerine i‘lâm olundu. Fî 2 min-Zilhicce sene 1205