Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 528 Hüküm no: 810 Orijinal metin no: [66a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Maryem bt. Haçador’un vârisleri arasında çıkan ihtilafın giderildiği Ma‘rûz; Medîne-i Üsküdar’da Yenimahalle’de mütemekkine iken bundan akdem hâlike olan Maryem bt. Haçador nâm Nasrâniye’nin verâseti zevc-i metrûku Bogos v. Marsık nâm zimmî ile li-ebeveyn ammisi oğlunun oğlu Hanparsum v. Avanis nâm zimmîye münhasıra ve terekesinin nısfı zevc-i merkūm Bogos’a ve nısf-ı âharı merkūm Hanparsum’a isâbeti tahakkukundan sonra arzuhâl eden merkūm Hanparsum meclis-i şer‘-i hatîrde ber-vech-i âtî münâza‘un-fîh olan menzile vâzı‘ü’l-yed olan Kazer nâm zimmî hâzır olduğu hâlde tereke-i hâlik-i merkūma vâzı‘ü’l-yed olan zevc-i merkūm Bogos zimmî muvâcehesinde merkūm Bogos zimmî mûrisem hâlike-i merkūmenin mahalle-i mezbûrede vâki‘ bir bâb mülk menzili ve derûn-ı menzilde olan bi’l-cümle eşyâsını ve medîne-i mezbûrede Gülfam Hatun Câmi‘-i şerîfi derûnunda vâki‘ dakīk değirmeninde olan beyne’l-esnâf gedik ta‘bîr olunur bârgirlerden nısf hisse-i şâyi‘amı fuzûlî kabz etmekle ber-tashîh-i merkūm eşyâ-i muharrereden bana isâbet eden nısf hisse-i şâyi‘inden kasr-ı yed ve bana teslîme hâzır-ı merkūm ile merkūm Bogos zimmîlerden her birine tenbîh olunmak matlûbumdur deyü da‘vâ ve merkūm Bogos zimmî cevâbında menzil-i mezkûru hâlike-i merkūma hâl-i sıhhatinde hâzır-ı merkūm Kazer zimmîye semen-i ma‘lûma bey‘ ve temlik ve derûn-ı menzilde olan eşyâsını dahi bâ-hüccet bana bey‘ edip ancak değirmen-i mezkûrda olan hisse-i şâyi‘ası müdde‘î-i merkūm ile bana mevrûs olmuş idi deyü ba‘de’d-def‘ hâzır-ı merkūm dahi tasdîk eyledikden sonra beynlerinde ba‘de vukū‘ı’l-münâza‘a bâ-tavassut-ı muslihîn müdde‘î-i merkūm Hanparsum zimmî da‘vâ-yı mezkûresinden merkūm Bogos zimmî ile yüz elli yedi guruş bedel-i makbûz mukābelesinde sulh olup menzil-i mezkûr ve derûn-ı menzilde olan eşyâsına ve değirmen hissesine ve hâlike-i merkūmenin kalîl ü kesîr menkūl ve akār cemî‘ terekesine ve husûs-ı mîrâsa müte‘allika âmme-i de‘âvî ve kâffe-i mütâlebâtdan zevc-i merkūm Bogos zimmî ile hâzır-ı merkūm Kazer’in zimmetlerini ibrâ ve ıskāt eyledikde onlar dahi ber-vech-i muharrer ibrâsını kabûl ve bu vechile kat‘-ı münâza‘a eyledikleri bi’t-terâzî Üsküdar mahkemesinde tescîl ve mübâşiri çavuş kulları iltimâsıyla huzûr-ı âlîlerine i‘lâm olundu. Fî 18 min-Z sene 1205