Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 529 Hüküm no: 812 Orijinal metin no: [66b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgi v. Nikola’nın Nikola v. Yani’ye olan borcunu ödemesi Ma‘rûz; Medîne-i Üsküdar’a tâbi‘ Kādı karyesinde mütemekkin Nikola v. Yani nâm zimmî medîne-i mezbûrede mahfil-i bâbda meclis-i şer‘-i hatîrde Francalacı Yorgi v. Nikola nâm zimmî muvâcehesinde merkūm Yorgi zimmî bin iki yüz dört senesi Receb-i şerîf’inin yedinci günü târihiyle müverrah işbu yedimde olan bir kıt‘a istiğlâl hücceti nâtık olduğu üzere bi-tarîki’l-karz yedimden istidâne ve kabz eylediği beş yüz guruş deyni mukābelesinde medîne-i mezbûreye tâbi‘ Kuzguncuk karyesinde vâki‘ ma‘lûmü’l-hudûd ve’l-müştemilât bir bâb mülk menzilini bi-tarîki’l-istiğlâl bana bey‘ u teslîm eyledikden sonra yine menzil-i mezkûru beher şehr altışar guruş onar para ücret kavliyle ba‘de’t-tahliye ve’t-takābuz benden istîcâr ve kabûl ve târih-i i‘lâma gelince on yedi ayda ücret-i merkūmeden zimmetinde müctemi‘a olan yüz altı guruş on parayı taleb ederim deyü da‘vâ ol dahi cevâbında menzil-i mezkûru müdde‘î-i merkūmdan ber-vech-i muharrer istîcârını ikrâr lâkin târih-i merkūmda müdde‘î-i merkūm yedinden ancak dört yüz guruş kabz edip ziyâde yüz guruşu kâziben ikrâr etmiş idim deyü ba‘de’d-def‘ bi’t-taleb müdde‘î-i merkūm Nikola zimmî gıbbe’t-tahlîfi’ş-şer‘î mûcebiyle meblağ-ı merkūm yüz altı guruş on parayı müdde‘î-i merkūma edâ ve teslîme merkūm Yorgi zimmîye tenbîh olunduğu bi’l-iltimâs huzûr-ı âlîlerine i‘lâm olundu. Fî 7 min-Z sene 1205