Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 530 Hüküm no: 813 Orijinal metin no: [66b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tatar Salih Ağa ile Hüseyin Ağa’nın aralarındaki husumeti bitirip sulh oldukları Ma‘rûz; Vilâyet-i Anadolu’da Beypazarı kazâsı ahâlisinden olup hâlâ medîne-i Üsküdar’da Hamzafakih mahallesinde misâfiren sâkin Tatar Salih Ağa b. Mehmed nâm kimesne medîne-i mezbûrede mahfil-i bâbda meclis-i şer‘-i hatîrde yine kazâ-i mezbûre ahâlisinden olup medîne-i mezbûrede Atpazarı’nda handa kezâlik misâfiren sâkin Hüseyin Ağa b. el-Hâc İbrahim mahzarında ben mezbûr Hüseyin Ağa ile mârrü’z-zikr Beypazarı kazâsında sâkinler iken târih-i i‘lâmdan yedi sene mukaddem mezbûr Hüseyin Ağa’nın hizmetkârlarından Abdulkadir nâm kimesne âhar hizmetkârını cerh ve firâr etdikde mezbûr Hüseyin Ağa ehl-i örf tâifesinden olup benim içün senin re’y ve ma‘rifetin ve tahrîk ve i‘ânetin iledir deyü benim menzilimi basıp sandığım derûnunda mevcûd nakd sekiz yüz elli dört guruş ile eşyâ-i memlûkemden sekiz yüz altmış guruş kıymetli bir kaput ve bir semmûr kürk ve bir kürk yakası ve bir kürk zağrası ve on iki miskāl inci ve bir sîm kuşak ve on yasdık ve altı minder ve dört yorgan ve kırk vakıyye evânî-i nühâsiye ve altı entari ve bir şalvar ve iki top keten bezimi menzil-i mezkûrum derûnundan fuzûlî ahz etmekle meblağ-ı merkūm sekiz yüz elli dört guruş nakd ile eşyâ-i muharrere-i mezkûre mevcûde ise a‘yânını müstehleke ise ba‘de’s-sübût kıymet-i şer‘iyesini taleb ederim deyü eylediği da‘vâsından bâ-tavassut-ı muslihîn elli guruş bedel-i makbûza sulh olup müdde‘âsı olan gerek nakd ve gerek eşyâ-i muharrere-i mezkûrdan ziyâdesine ve bi’l-cümle husûs-ı mezkûra müte‘allika âmme-i de‘âvî ve mutâlebâtdan mezbûr Hüseyin Ağa’nın zimmetini ibrâ ve ıskāt ol dahi bedel-i sulh nâmıyla müdde‘î-i mezbûr Salih Ağa’ya medfû‘u olan elli guruşa ve bi’l-cümle husûs-ı mezkûra müte‘allika âmme-i de‘âvîden müdde‘î-i mezbûr Salih Ağa’nın zimmetini ibrâ ve ıskāt ve her biri âharın ber-vech-i muharrer ibrâsını kabûl edip bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 23 min-Zilhicce sene 1205