Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 531 Hüküm no: 815 Orijinal metin no: [66b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nefise Hanım’la evlenip gerdek olmadan ayrılan Ahmed Ağa’nın mehir olarak verdiği parayı geri aldığı Ma‘rûz; Mahmiye-i İslâmbol’da Beyceğiz mahallesinde sâkine Nefise bt. Süleyman nâm hatun tarafından vekîl-i şer‘îsi Mustafa Efendi b. Halil medîne-i Üsküdar’da meclis-i şer‘-i hatîrde Ahmed Ağa b. Abdullah mahzarında mezbûr Ahmed Ağa târih-i i‘lâmdan dört gün mukaddem müvekkilem mezbûreyi elli guruş mehr-i mu‘accel ve yüz guruş mehr-i müeccel tesmiyesiyle tezevvüc ve iki gün mürûrunda kable’d-duhûl ve’l-halve müvekkilem mezbûreyi tatlîk etmekle mehreyn-i mezkûreynin nısflarını bi’l-vekâle taleb ederim deyü eylediği da‘vâsını beyân ve isbâta kādir olamadığından mâ‘adâ bundan akdem mehreyn ile mezbûr Ahmed Ağa müvekkilem mezbûreyi tezevvüce tâlib ve mu‘accel-i mezkûru vekîl-i mezbûra teslîm edip kable’l-akd nâdim olmağla vekîl-i mezbûr meclis-i şer‘de adem-i akdi ikrâr ve makbûzu olan mu‘accel-i mezkûr elli guruşu mezbûr Ahmed Ağa’ya redd ü teslîm eylediği vekîl-i mezbûrun ikrârıyla sâbit ve da‘vâ-yı mezkûresiyle mezbûr Ahmed Ağa’ya bî-vech mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 13 min-Z sene 1205