Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 532 Hüküm no: 816 Orijinal metin no: [66b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma Hanım’ın Salih b. Mustafa’dan aldığı ineğin hamile olmadığının anlaşılması üzerine satışın iptal olunduğu Ma‘rûz; Medîne-i Üsküdar’a tâbi‘ Kandilli karyesinde sâkine ve zâtı mu‘arrefe Fatıma bt. Salih nâm hatun medîne-i mezbûrede meclis-i şer‘-i hatîrde Salih b. Mustafa nâm Kıbtî muvâcehesinde Mezbûr Salih târih-i i‘lâmdan iki buçuk ay mukaddem bir re’s ineğini hâmil olmak üzere otuz guruş semen-i medfû‘ ve makbûza bana bey‘ u teslîm ben dahi ber-vech-i muharrer iştirâ ve tesellüm ve kabz etmiş idim lâkin zikr olunan ineğin hâmil olmadığı zâhir olmağla zikr olunan ineği red ve semen nâmıyla medfû‘um olan meblağ-ı merkūm otuz guruşu istirdâd ile beynimizde cârî olan akd-i bey‘in ikāle olunması murâdımdır deyü ba‘de’d-da‘vâ ve’l-istintâk ve’l-ikrâr mûcebiyle akd-i ikālelerine binâen meblağ-ı merkūm otuz guruşu müdde‘iye-i mezbûreye edâ edip mezkûr ineği ahz etmek üzere mezbûr Salih’e tenbîh olunduğu bi’l-iltimâs huzûr-ı âlîlerine i‘lâm olundu. Fî 18 min-Z sene 1205