Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 533 Hüküm no: 818 Orijinal metin no: [67a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hafız Abdi Efendi ve kardeşinin müştereken sahip oldukları dükkânın biriken kira alacaklarının tahsili Ma‘rûz; Medîne-i Üsküdar’da Hayreddin Çavuş mahallesi sükkânından Hafız el-Hâc Abdi Efendi ve Fatıma evlâd-ı Ali nâm karındaşlar meclis-i şer‘-i hatîrde es-Seyyid Yakub ve es-Seyyid Mustafa ibney es-Seyyid Mehmed nâm karındaşlar mahzarlarında mezbûrân es-Seyyid Yakub ve es-Seyyid Mustafa mahalle-i mezbûrede vâki‘ bir bâb kahve dükkânımızda beher şehr üçer guruş onar para ücret tesmiyesiyle müstecirimiz olmağla ücret-i mezkûreden i‘lâm senesi Şevvâl’i gāyetine gelince altmış iki buçuk ayda zimmetlerinde müctemi‘a olan iki yüz yirmi yedi guruş hakkımızın yirmi altı guruşunu yedlerinden ahz ve iki yüz bir guruşu hâlâ zimmetinde olmağla taleb ederiz deyü eyledikleri da‘vâlarından bâ-tavassut-ı muslihîn seksen altı guruş bedel üzerine mezbûrân es-Seyyid Yakub ve es-Seyyid Mustafa ile ba‘de’s-sulh ve’l-kabûl ziyâde müdde‘âları olan yüz on beş guruşa ve husûsı mezkûra müte‘allika âmme-i de‘âvîden mezbûrân es-Seyyid Yakub ve es-Seyyid Mustafa’dan her birinin zimmetlerini ale’l-infirâd ibrâ ve ıskāt onlar dahi ber-vech-i muharrer ibrâlarını ba‘de’l-kabûl bedel-i sulh-ı merkūm seksen altı guruşun elli guruşunu bin iki yüz altı senesi Muharrem’i gurresinde müdde‘iyân-ı mezbûrâna edâ ve mâ‘adâ otuz altı guruşunu işbu hâzır bi’l-meclis Hayreddin Çavuş Vakfı mütevellîsi olan İmâm Ali Efendi’ye havâleten edâ etmek üzere her biri ta‘ahhüd ve müdde‘iyân-ı mezbûrândan her biri dahi râzılar olup bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 9 min-Za sene 1205