Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 534 Hüküm no: 820 Orijinal metin no: [67a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine Hanım’ın boşandığı kocası Mehmed Nuri’den mihrini aldığı Ma‘rûz; Medîne-i Üsküdar’da Kādıasker mahallesinde sâkine mu‘arrefetü’z-zât Emine bt. Hasan nâm hatun medîne-i mezbûrede mahfil-i bâbda meclis-i şer‘-i hatîrde zevc-i sâbıkı Mehmed Nuri b. Mustafa nâm kimesne tarafından ber-vech-i âtî vekîl olduğu Derviş el-Hâc Abdullah b. Mehmed ve Nuh b. Ahmed nâm kimesneler şehâdetleriyle sâbit olan Ali b. Hüseyin nâm kimesne muvâcehesinde ben müvekkil-i mezbûr Mehmed Nuri’nin otuz üç guruş mehr-i müeccel tesmiyesiyle zevce-i medhûlün-bihâsı iken târih-i i‘lâmdan beş ay mukaddem beni tatlîk etmekle zevcim müvekkil-i mezbûr Mehmed Nuri’nin zimmetinde mütekarrir ve ma‘kūdun-aleyh olan meblağ-ı merkūm otuz üç guruş mehrimi bundan akdem taleb ve da‘vâ sadedinde olmuş idim el-hâletü hâzihî beynimize muslihûn tavassut edip beni da‘vâ-yı mezkûremden on beş guruş üzerine inşâ-i akd-i sulh eylediklerinde ben dahi sulh-ı mezkûru kabûl ve bedel-i sulh olan meblağ-ı merkūm on beş guruşu vekîl-i mezbûr Ali yedinden tamamen ahz ü kabz edip ziyâde mehrime ve hukūk-ı zevciyete müte‘allika âmme-i de‘âvî ve kâffe-i mutâlebât ve kâffe-i eymân ve muhâsamâtdan zevc-i sâbıkım müvekkil-i mezbûr Mehmed Nuri’nin zimmetini ibrâ ve ıskāt eylediğimde vekîl-i mezbûr dahi bana medfû‘u olan bedel-i sulh-ı merkūm on beş guruşa ve hukūk-ı zevciyete müte‘allika âmme-i de‘âvîden benim zimmetimi ibrâ ve ıskāt ve her birimiz âharın ber-vech-i muharrer ibrâsını kabûl eyledik dedikde vekîl-i mezbûr Ali dahi müdde‘iye-i mezbûreyi bi’l-cümle kelimât-ı meşrûhasında tasdîk ve tahkīk eylediği bi’l-iltimâs huzûr-ı âlîlerine i‘lâm olundu. Fî 29 min-L sene 1205