Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 535 Hüküm no: 823 Orijinal metin no: [67a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali’nin Derviş Mehmed ve arkadaşlarına olan borcunu ödemesi Ma‘rûz; Vilâyet-i Anadolu’da Antakya kazâsı ahâlisinden olup medîne-i Üsküdar’da misâfiren sâkinler askerî tâifesinden Derviş Mehmed b. el-Hâc Ahmed ve Mustafa b. Mahmud ve es-Seyyid Hamza b. Abdullah nâm kimesneler medîne-i mezbûrede mahfil-i bâbda meclis-i şer‘-i hatîrde el-Hâc Ali b. Hasan nâm kimesne mahzarında mezbûr el-Hâc Ali târih-i i‘lâmdan üç sene mukaddem yedimizden ve mâlımızdan iştirâ ve kabz eylediği mikdâr ve evsâf ve fiyâtı beynimizde ma‘lûm alaca ve kutnî ve Hamavî kuşak semenlerinden ba‘de-külli’l-hesâb elli guruş bâkī zimmetinde hakkımız kalıp hatta meblağ-ı bâkī-i merkūm cihet-i mezkûreden bize deyni olduğunu medîne-i mezbûrede vâki‘ el-Hâc Mustafa nâm kimesnenin hanında huzûr-ı Müslimînde târih-i i‘lâmdan iki gün mukaddem ikrâr dahi etmiş idi deyü ba‘de’d-da‘vâ ve’l-istintâk ve’l-inkâr müdde‘iyûn-ı merkūmûn ber-vech-i muharrer merkūm el-Hâc Ali’nin ikrâr-ı meşrûhunu lede’t-tezkiye adâletleri zâhir olan el-Hâc Mehmed Ali ve es-Seyyid Hasan b. İbrahim nâm kimesneler şehâdetleriyle ber-nehc-i şer‘î münkir-i mezbûr muvâcehesinde isbât etmeleriyle mûcebiyle meblağ-ı bâkī-i merkūm elli guruşu müdde‘iyûn-ı merkūmûna edâya mezbûr el-Hâc Ali’ye tenbîh olunduğu bi’l-iltimâs huzûr-ı âlîlerine i‘lâm olundu. Fî-selh-i Zilka‘de sene 1205