Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 536 Hüküm no: 824 Orijinal metin no: [67a-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müflisen vefat eden Kıbti Ali b. Mustafa’dan geriye terekesinin kalmadığı Ma‘rûz; Mahmiye-i İslâmbol hısnı ebvâbından Topkapısı dâhilinde mütemekkin iken bir sene mukaddem vefât eden Ali b. Mustafa nâm Kıbtînin verâseti zevce-i metrûkesi Âişe bt. Veli nâm Kıbtiye ile babası merkūm Mustafa ve anası Fatıma bt. Mehmed’e münhasıra ve tashîh meselesi bi-hükmi’l-ferâiz dört sehm i‘tibârıyla bir sehmi zevce-i merkūmeye ve bir sehm-i sülüs mâ-yebkā ümm-i merkūmeye ve bâkī iki sehmi eb-i merkūma şer‘an isâbeti tahakkukundan sonra şahsı mu‘arrefe zevce-i merkūme Âişe medîne-i Üsküdar’da mahfil-i bâbda meclis-i şer‘-i hatîrde kezâlik şahsı mu‘arrefe ümm-i merkūme Fatıma ile eb-i merkūm Mustafa nâm Kıbtî muvâcehelerinde ben merkūm Ali’nin otuz guruş mehr-i müeccel tesmiyesiyle zevce-i medhûlün-bihâsı iken zevcim merkūm vefât edip otuz guruş mehr-i mezkûr hisse-i irsiyemi terekesine vâzı‘ü’l-yed olan ebeveyn-i merkūmândan taleb ederim deyü ba‘de’d-da‘vâ ve’l-istintâk merkūmândan her biri cevâbında müteveffâ-yı merkūm Ali müflisen fevt olup tereke nâmıyla ism-i mâl ıtlâk olunur bir şeyi yokdur deyü eyledikleri def‘lerini müdde‘iye-i merkūme Âişe tasdîk etmekle mûcebiyle müdde‘iye-i merkūme bî-vech-i şer‘î mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 16 min-Z sene 1205