Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 536 Hüküm no: 825 Orijinal metin no: [67b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kostanti v. Rali’nin terekesinin vârisleri arasında taksim edilip vakıf dalyanlardaki reislik iddiasından vazgeçilip hisseleri karşılığında vârislerine yıllık bir ücretin ödenmesi Ma‘rûz; Sâdır olan fermân-ı âlîlerine imtisâlen hâlâ Evkāf Müfettişi fazîletlü el-Hâc Ahmed Efendi tarafından meb‘ûs fahrü’l-müderrisîni’l-kirâm Derviş Mustafa Efendi dâ‘îleri ile medîne-i Üsküdar mahkemesinde bi’l-ma‘iyye akd olunan meclis-i şer‘-i hatîrde medîne-i mezbûreye tâbi‘ Kādı karyesinde mütemekkin iken bundan akdem hâlik olan Kostanti v. Rali zimmînin verâseti zevce-i metrûkesi Pelaşa bt. Londeri nâm Nasrâniye ile anası Zoliçe bt. Kostanti ve sulbî sagīr oğulları Nikola ve Aletko ve Yani ve Yorgi’ye münhasıra olduğu tahakkukundan sonra arzuhâl eden şahsı mu‘arrefe zevce-i mersûme Pelaşa Nasrâniye kendi nefsinden asâleten ve sagīrûn-ı merkūmûnun vasîleri olmağla vesâyeten meclis-i ma‘kūd-ı mezkûrda zikri âtî vakf-ı şerîfin hâlâ mütevellîsi taraflarından vekîl-i şer‘îleri olan el-Hâc İsmail Efendi hâzır olduğu hâlde münâza‘un-fîh olan ber-vech-i âtî dalyanların riyâsetine vâzı‘ü’l-yed olan arzuhâlde ismi mezkûr Manol v. Yorgaki nâm zimmî muvâcehesinde nezâret-i Şeyhülislâm’da âsûde olan evkāfdan cennet mekân firdevs-âşiyân merhûm ve mağfûrun-leh Sultan Bâyezid Hân-ı Velî -tâbe serâhû- hazretlerinin vakfı musakkafâtından Boğazkesen Kal‘ası hudûdu dâhilinde Eskifener nâm mahâlde Filorna ve Kilyoz nâ[m] mevzi‘lerde iki ocak vakıf dalyana ber-mûceb-i temessük iki yüzer akçe bedel-i öşr-i mukāta‘adan elli iki buçuk akçe mukāta‘alı hisse ile medîne-i mezbûre tevâbi‘inden Beykoz kasabası önünde iki ocak ve Kādı karyesinde Modaburnu nâm mahâlde bir ocak ki cem‘an üç ocak mülk dalyandan kırk sehm i‘tibârıyla on sekiz sehm hisse-i şâyi‘ası hâlik-i merkūmun ile’l-helâk yedinde mülkü ve ba‘de- helâkihî bize ve evlâd-ı sıgārına mevrûs ve intikāl etmiş idi lâkin hâlik-i merkūm hâl-i sıhhatinde zikr olunan dalyanlarda reis olup ba‘de’l-helâk işbu merkūm Manol zimmî reis olup riyâsete merbût olan menâfi‘ini ahz etmekle merkūm Manol reislikden ihrâc ve sıgār-ı merkūmûn taraflarından bir kimesne reis vekîli olup menâfi‘inden sıgār-ı merkūmûn dahi müntefi‘ olmak bi’l-vesâye murâdımdır dedikde vâzı‘ü’l-yed reis-i merkūm Manol zimmî cevâbında zikr olunan dalyanların reisliği müstakil bir hizmet olup ez-kadîm neslimizin ekber evlâdı mutasarrıf ola gelmekle babam Yorgaki zimmî reis iken hâlik oldukdan sonra küçük karındaşı ammim hâlik-i merkūm Kostanti zimmî kebîr bulunup hâlik oldukda ben hâlâ kebîr-evlâdından olduğuma binâen zikr olunan dalyanda reis olup amel-i kadîm dahi vech-i muharrer üzeredir deyü beynlerinde ba‘de-vukū‘ı’l-münâza‘a zikr olunan dalyanda evlâd ve akrabâya mevrûs ve intikāl eder akār ve emlâk misillü olmayıp ancak dalyan neferâtı beynlerinde bir emr-i i‘tibârı olmağla fî-mâ ba‘d beher sene hissedârlar beynlerinde taksîm olunan hisseden mâ‘adâ zikr olunan reislik da‘vâsından kat‘an-li’n-nizâ‘ beher sene sıgār-ı merkūmûna kırk guruş vermek üzere merkūm Manol zimmî ta‘ahhüd eyledikde vasî-i merkūme dahi ber-minvâl-i muharrer râzıye ve eylediği reislik da‘vâsından bi’l-vesâye fâriğa olup kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 28 min-Z sene 1205