Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 537 Hüküm no: 826 Orijinal metin no: [67b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Canbaz Mehmed Ağa’nın kocasından ayrı yaşayan kızı Fatma’nın yeni doğan oğlunun eceliyle öldüğü Ma‘rûz; Medîne-i Üsküdar’da Hayreddin Çavuş mahallesinde sâkin Canbaz Mehmed Ağa b. el-Hâc Muslu nâm kimesne meclis-i şer‘-i hatîrde bast-ı kelâm edip hâlâ dâmâdım gāib ani’l-meclis Abdülhamid’in firâşından sadriye kızım Fatıma hâmile olup beynlerinde münâferet vâki‘ olmağla kızım mezbûre benim menzilimde sâkine ve târih-i i‘lâmdan yirmi gün mukaddem vaz‘-ı haml edip bir veled-i müzekkeri zuhûr ve ismi Mehmed Şâkir tesmiye olunup bu esnâda sagīr-i mezbûr bi-emrillâhi te‘âlâ fevt olmağla babası gāib-i mezbûr münâferet-i kadîmeye binâen oğlum sagīr-i mezbûru siz helâk eylediniz deyü beni ihâfe ve levâzım-ı defnini rü’yetden men‘ etmekle mu‘âraza olunup defnine izin verilmek matlûbumdur dedikde kıbel-i şer‘den Mehmed Efendi irsâl olunup ol dahi mahalle-i mezbûre ahâlisinden İmâm Ali Efendi b. Ali ve el-Hâc Mustafa b. Abdullah ve Hasan Ağa b. Hüseyin ve Mehmed Ağa b. Hüseyin ve Hafız İbrahim Efendi b. İbrahim ve Molla Hüseyin b. Süleyman ve Ali b. Ahmed ve Mehmed Ağa b. Halil ve Hafız Mehmed b. İbrahim ve Memiş Ağa b. Mustafa ve sâir mazbûtü’l-esâmî Müslimîn ile sagīr-i mezbûrun a‘zâsına nazar eylediklerinde eser-i cerh ve hank misillü nesne olmayıp hatfe enfihi vefât eylediğini mezbûr dâ‘îleri mahâllinde ba‘de’t-tahrîr ve’l-inhâ huzûr-ı âlîlerine i‘lâm olundu. Fî 22 min-Z sene 1205