Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 538 Hüküm no: 827 Orijinal metin no: [67b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarıgazi Zaviyesi Vakfı’nın kıble tarafındaki tarlanın vakfa ait olduğu Ma‘rûz; Mahrûse-i Galata muzâfâtından Rumelihisârı’nda Boğazkesen Kal‘ası müstahfızlarından sâhib-i arzuhâl Ahmed Ağa b. İsmail tarafından ber-vech-i âtî vekîl-i müseccel-i şer‘îsi Salih Efendi b. el-Hâc Mehmed nâm kimesne medîne-i Üsküdar’da meclis-i şer‘-i hatîrde medîne-i mezbûre hâricinde Sarıgazi Zâviyesi Vakfı’nın hâlâ mütevellîsi arzuhâlde ismi mezkûr Molla İbrahim b. Hasan mahzarında zâviye-i mezkûrenin kıble cânibinde vâki‘ etrâf-ı erba‘ası zâviye-i mezkûre ve Davudoğulları tarlası ve tarîk-i âm ile mahdûd yirmi keyl tohum istî‘âb eder bir kıt‘a tarlayı mütevellî-i mezbûr zâviye-i mezkûre vakfı olmak üzere ta‘şîr etmekle ben dahi müvekkilim mezbûrun bâ-berât-ı âlî-şân tımarı arâzisinden deyü bi’l-vekâle da‘vâya tasaddî etmiş idim deyü tarla-yı mezkûr fi’l-hakīka zâviye-i mezkûre vakfı olduğu bî-garaz ehl-i vukūf ihbârlarıyla zâhir olduğuna binâen ben dahi da‘vâ-yı mezkûremden fâriğ ve tarla-yı mezkûru zâviye-i mezbûre vakfı olmak üzere terk eylediğimde mütevellî-i mezbûr dahi zâviye-i mezkûrenin zikr olunan kıble cânibinde tarla-yı mezkûrdan mâ‘adâ bi’l-cümle tarlalar müvekkilim mezbûrun tımarı arâzisinden olduğunu ikrâr ve müdâhale etmemek üzere ta‘ahhüd edip bu vechile kat‘-ı münâza‘a eyledik deyü vekîl-i mezbûrun takrîr-i meşrûhunu mütevellî-i mezbûr dahi tasdîk edip beynleri ıslâh olunduğu bi’l-iltimâs huzûr-ı âlîlerine i‘lâm olundu. Fî 25 min-Z sene 1205