Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 539 Hüküm no: 828 Orijinal metin no: [67b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kirkor v. Serkiz’in borcunu ödemesi Ma‘rûz; Vilâyet-i Anadolu’da Kayseriye kazâsına tâbi‘ Dede karyesi mütemekkinlerinden iken bundan akdem hâlik olan Karabet v. Agob zimmînin verâseti sulbî kebîr oğlu Serkiz nâm zimmî medîne-i Üsküdar’da mahfil-i bâbda meclis-i şer‘-i hatîrde Kirkor v. Serkiz nâm zimm muvâcehesinde merkūm Kirkor zimmî târih-i i‘lâmdan dört sene mukaddem babam hâlik-i merkūmun sağlığında yedinden istidâne ve kabz ve umûruna sarfla istihlâk eylediği elli guruş hakkını kable’l-ahz ve’l-istifâ hâlik olmağla meblağ-ı merkūm elli guruşu bana mevrûs ve ben dahi hâlik-i merkūmun hasran vârisi olmamla bi’l-verâse taleb ederim deyü da‘vâ ve merkūm Serkiz cevâbında fi’l-hakīka hâlik-i merkūma cihet-i mezkûreden ol-mikdâr deyni olduğunu ve müdde‘î-i merkūm hâlik-i merkūmun hasran vârisi ve sulbî kebîr oğlu olduğunu ikrâr lâkin deyn-i mezkûru hâlik-i merkūmun sağlığında tamamen kendiye edâ ve teslîm etmiş idim deyü ba‘de’d-def‘ ve’l-inkâr dâfi‘-i merkūm Kirkor zimmî def‘-i mezkûrunu beyândan izhâr-ı acz birle müdde‘î-i merkūm Serkiz zimmî bi’t-taleb gıbbe’t-tahlîfi’ş-şer‘î mûcebiyle meblağ-ı merkūm elli guruşu müdde‘î-i merkūm Serkiz zimmîye edâ ve teslîme merkūm Kirkor zimmîye tenbîh olunduğu bi’l-iltimâs huzûr-ı âlîlerine i‘lâm olundu. Fî 20 min-Z sene 1205