Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 540 Hüküm no: 830 Orijinal metin no: [68a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rabia Hanım’ın vefat eden Mehmed Ali’den alacaklı olduğu yolundaki iddiasını ispatlayamadığı Ma‘rûz; Mahmiye-i İslâmbol’da Sultan Selim Han -tâbe serâhû- Câmi‘-i şerîfi kurbünde sâkine mu‘arrefetü’z-zât Rabia bt. Receb nâm hatun medîne-i Üsküdar’da mahfil-i bâbda meclis-i şer‘-i hatîrde medîne-i mezbûreye tâbi‘ Bulgurlu karyesi sükkânından iken fevt olan Mehmed b. Ali’nin verese-i münhasırasından kezâlik zâtı mu‘arrefe zevcesi Hamide bt. Halil nâm hatun ile sulbî kebîr oğulları Mehmed ve Ali nâm kimesneler mahzarlarında bundan akdem müteveffâ-yı mezbûr Mehmed karye-i mezbûrede vâki‘ yedimden iştirâ ve kabz eylediği bağımın üzüm mahsûlü semeninden yüz guruş ile yedimden istidâne ve kabz eylediği yüz altmış iki guruşun on beş guruşunu hayatında ahz ve bâkī yüz kırk yedi guruş ki cem‘an iki yüz kırk yedi guruş müteveffâ-yı mezbûrun zimmetinde kalıp kable’l-ahz fevt olmağla terekesine vâzı‘ü’l-yed olan verese-i mezbûrûndan taleb ederim deyü da‘vâ, onlar dahi cevâblarında müdde‘iye-i mezbûrenin üzüm semeninden müdde‘âsı olan meblağ-ı merkūm yüz guruşu inkârlarından mâ‘adâ meblağ-ı merkūm yüz kırk yedi guruşu dahi müdde‘iye-i mezbûre Rabia Hatun’a bin iki yüz bir senesi Recebi’nin yirmi yedinci günü mûrisimiz müteveffâ-yı mezbûrun hâl-i hayatında Dîvân-ı âlî’de ma‘kūd meclis-i şer‘de taleb ve da‘vâ eyledikde mûrisimiz müteveffâ-yı mezbûr dahi müdde‘iye-i mezbûrenin kabzını mu‘terife olduğu on beş guruşdan mâ‘adâ yüz kırk yedi guruşu müdde‘iye-i mezbûre yedine edâ ve teslîm edip hatta müdde‘iye-i mezbûre mahrûse-i Galata muzâfâtından Beşiktaş kasabasında sâkin Hattât Yusuf Efendi menzilinde medfû‘âtının hesâbını ve meblağ-ı merkūmdan zimmetini beri’e olduğunu müdde‘iye-i mezbûrenin ikrârını şühûd-ı udûlle muvâcehesinde isbât ve bî-vech mu‘ârazadan men‘ olunmuş idi deyü takrîrlerine mutâbık ve târih-i merkūm ile müverrah bir kıt‘a i‘lâm-ı şer‘î ibrâzıyla ba‘de’d-def‘ ve’l-inkâr tarafeynden her biri def‘ ve müdde‘âlarını beyân esnâsında beynlerine muslihûn tavassut edip müdde‘iye-i mezbûre tasaddî eylediği da‘vâ-yı mezkûresinden an-inkârin otuz guruş bedel-i makbûza sulh olup ziyâde mutâlebesine ve bi’l-cümle husûs-ı merkūma müte‘allika âmme-i verese-i mezbûrûnun zimmetlerini ibrâ ve ıskāt onlar dahi medfû‘ları olan otuz guruşa müte‘allika âmme-i de‘âvîden mezbûre Rabia Hatun’un zimmetini ibrâ ve ıskāt ve her biri âharın ber-vech-i muharrer ibrâsını kabûl edip kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 5 min-M sene 1206