Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 541 Hüküm no: 831 Orijinal metin no: [68a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cebeci Çorbacısı Veli Ağa’nın kızı olup vefat eden Ümmügülsüm’ün hayatta iken kendisine sattığı ve damadının evinde bulunan eşyaların kendisine teslim edilmesi Ma‘rûz; Medîne-i Üsküdar’da Turbali mahallesi sükkânından Cebeci Çorbacısı Veli Ağa b. Mahmud nâm kimesne medîne-i mezbûrede meclis-i şer‘-i hatîrde Sâbıkā dâmâdı Mustafa Ağa b. İbrahim nâm kimesne mahzarında bundan akdem vefât eden sulbiye kızım Ümmügülsüm nâm hatun vefâtından kırk sekiz gün mukaddem hâl-i hayatında ve kemâl-i akl-i sıhhatinde işbu yedimde olan bir kıt‘a hüccet-i şer‘iye nâtıka olduğu üzere emlâkinden bir Mushaf ve üç aded elmas çiçek ve bir çift altun bilezik ve bir elmaslı gerdâniye ve bir çift altun kuşak ve bir çift zümrüd küpe ve iki zümrüd yüzük ve iki yâkut yüzük ve bir altun rub‘iyeli yüzük ve on sim zarf ve bir sim tabak ma‘a kaşık ve bir sîmli âyinesini hibe-i sahîha-i şer‘iye ile bana hibe ve temlik ben dahi ittihâb ve kabz ve kabûl eyledikden sonra yine eşyâ-i memlûkesinden on çatma yasdık ve beş minder ve üç çuka mak‘ad ve dört şilte ve üç basma mak‘ad ve iki Hatâyî köşe yasdığı ve iki baş yasdığı ve iki şilte ve iki beledî döşek ve dokuz yorgan ma‘a çârşeb ve bir sagīr yorgan ve dört yüz yasdığı ve bir orta keçesi ve bir kapı perdesi ve bir ocak yaşmağı ve bir çuka seccâde ve bir şalî ferâce ve bir çuka ferâce ve bir şalî cebe ve bir çiçekli cebe ve bir boğasi cebe ve dört çiçekli entari ve bir şalî entari ve bir sincab kürk ve bir kākım kürk ve dokuz kat çamaşır ve altı don ve iki çiçekli don ve üç top gömleklik bez ve sekiz çârşeb ve dört işleme havlu ve kırk aded çevre ve aş makraması ve dokuz uçkur ve iki sofra ve üç peşkir ve altı tencere ma‘a [kapak] ve bir kebîr sini ve iki sagīr sini ve iki kadayıf tepsisi ve on beş sahan bâ-kapak ve iki güğüm ve iki leğen ma‘a ibrik ve bir kebîr leğen ve bir mangal ve iki şorba tası ve bir tâbe ve iki lenger ve bir kahve tepsisi ve dört kahve ibriği ve iki kâse ve dört şamdanını safka-i vâhide ile iki yüz elli guruşa bana bey‘ ve temlik ve semeni mutâlebesinden zimmetimi ibrâ ve ıskāt eyledikde ben dahi iştirâ ve kabûl edip lâkin eşyâ-i mezkûre kızım mezbûrenin zevci dâmâdım mezbûrun menzilinde olmağla suâl olunup bana teslîme tenbîh olunmak matlûbumdur deyü takrîrine mutâbık bir kıt‘a hüccet-i şer‘iye ibrâzıyla da‘vâ ve mezbûr Mustafa Ağa cevâbında eşyâ-i muharrere-i mezkûreyi ber-mantûk-ı hüccet bey‘ini ve hibe ve teslîmini ve hâlâ eşyâ-i mezkûre menzilinde mevcûde olduğunu ikrâr lâkin zevcem müteveffât-ı mezbûre hasta ve sâhibetü firâş ve gālib hâli helâk olduğu hâlde bey‘-i mezkûr ve hibe-i mezkûresi maraz-ı mevtinde olmuş idi deyü hâl-i sıhhatinde olduğunu inkâr etmeğin müdde‘î-i mezbûr Veli Ağa kızı müteveffât-ı mezbûre ber-mantûk-ı hüccet eşyâ-i muharrere-i mezkûreyi bey‘ ve huliyy-i mezkûrelerini dahi hibe ve teslîm eylediği hînde cemî‘ tasarrufâtı nâfize ve umûrunu rü’yete kādire olup hâl-i sıhhatinde olduğunu lede’t-tezkiye adâletleri zâhir olan merhûmenin hâli Hüseyin Ağa b. Mehmed nâm kimesne ile Fatıma bt. Osman ve diğer Fatıma bt. Ömer nâm hatunlar şehâdetleriyle vech-i şer‘î üzere muvâcehesinde isbât etmeğin eşyâ-i muharre-i mezkûreyi müdde‘î-i mezbûr Veli Ağa’ya teslîme dâmâdı mezbûr Mustafa Ağa’ya tenbîh olunduğu bi’l-iltimâs huzûr-ı âlîlerine i‘lâm olundu. Fî 22 min-Z sene 1205