Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 542 Hüküm no: 832 Orijinal metin no: [68a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Ahmed’in Duvarcı Anderya’ya olan borcunu ödediği Ma‘rûz; Medîne-i Üsküdar’a tâbi‘ İstavros karyesinde mütemekkin duvarcı tâifesinden Anderya v. Tanaş nâm zimmî medîne-i mezbûrede mahfil-i bâbda meclis-i şer‘-i hatîrde Mehmed b. Ahmed mahzarında târih-i i‘lâmdan sekiz ay mukaddem mezbûr Mehmed’in karye-i mezbûrede vâki‘ ma‘lûmü’l-hudûd bir kıt‘a arsası üzerine müceddeden binâ ve inşâ etmek üzere mukāvele olunan bir bâb menzilini ber-vech-i muharrer itmâm ve ikmâl eylediğimden sonra masrûfum olan altı yüz seksen yedi guruş hakkımın beş yüz kırk altı guruşunu yedinden ahz ü kabz ve yüz kırk bir guruşu zimmetinde hâlâ bâkī kalmağla mezbûr Mehmed’den taleb ederim deyü eylediği da‘vâsından bâ-tavassut-ı muslihîn kırk bir guruş bedel-i makbûza mezbûr Mehmed ile sulh olup ziyâde müdde‘âsı olan yüz guruşa ve bi’l-cümle husûs-ı mezkûra müte‘allika âmme-i de‘âvîden merkūm Mehmed’in zimmetini ba‘de’l-ibrâ ve’l-kabûl mezbûr Mehmed dahi medfû‘u olan kırk bir guruşa ve bi’l-cümle husûs-ı mezkûra müte‘allika âmme-i de‘âvîden merkūm Anderya zimmînin zimmetini ba‘de’l-ibrâ ve’l-kabûl bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 9 min-M sene 1206